சிவபிரான், சடைமுடிமேல் அரவம் மதி ஊமத்தம் மலர் ஆகியன கலந்து விளங்குமாறு அணிந்துள்ளார். தொண்டர்கள் பலரும் நாள்தோறும் கலந்து வணங்க மகிழ்வுறும் திருப்பனையூரே சிவபிரானது தலமாகும்.
சிவபிரான், மனம் ஒன்றி நினைந்த அடியார்களின் உள்ளத்தே இருந்து, அவர்தம் வழிபாட்டை ஏற்று மகழ்கின்றான். தேன்பொருந்திய மலர்களோடு உயர்ந்துள்ள சோலைகளில் வண்டுகள் பண் ஒன்றிய ஒலி செய்யும் திருப்பனையூரே அந்தச் சிவபிரானுடைய தலமாகும்.
சிவபிரான், எரிபோல விளங்கும் சிவந்த சடைமுடிமீது வளரும் பிறை ஒன்றை உடையவன். அடியவர்களில் சிலர் என்றும் இருந்து திருவடிகளைப் பரவிப் பூசனை செய்து போற்றவும், பலர் பலகாலும் வந்து வணங்க, விளங்கும் திருப்பனையூரே அந்தப் பெருமானின் திருத்தலம் ஆகும்.
சிவபிரான், கரைகளை மோதுதல் செய்யும் கடலிடைத் தோன்றிய நஞ்சை அமுதாக உண்டார். அவர், தமது மேனிமீது திருநீற்றுப் பொடியை நிரம்பப் பூசியுள்ளார். அடியவர்கள் தொழ, மன்னவர்கள் ஏத்த உலகில் வாழும் பிறமக்கள் பணியும் திருப்பனையூர், அந்தப் பெருமானது ஊராகும்.
சிவபிரான், ஒலிக்கின்ற வீரக்கழல்மேல், அரவு ஆட, முன்கைகளில் பலியேற்றுத் திரியும் பிட்சாடனராக விளங்குகின்றார். மண்ணுலகில் சிறந்த புகழை உடைய திருவிழாக்கள் நிறைய நடப்பனவால், பறைகளின் ஒலி இடைவிடாது பயிலும் திருப்பனையூர் அந்தப் பிட்சாடனரின் ஊராகும்.
சிவபிரான், தம்மைப் பூசனை செய்து தொழவல்ல அடியவர்களுக்கு அண்மையில் இருப்பவர். அவர், அடியவர்கள் அருகிருந்து ஏத்துமாறு உள்ள நீலமணி போன்ற கழுத்தை உடையவர். தன்னைப் பணியும் அடியவர்கள் குளிர்ந்த மலர்களைக் கொண்டு, இருபோதும் தூவி வழிபடும் இடமான திருப்பனையூர் அந்தச் சிவபிரானுடைய ஊராகும்.
சிவபிரான் தன்னை வணங்காத பகைவர்களான அசுரர்களின் மூன்று அரண்களையும் அழித்தவர். விடையில் ஊர்ந்து வருபவர். வலிய யானையை உரித்து, அதன் தோலை மேல் ஆடையாகக் கொண்டவர். எண்ணற்ற பூதப்படைகளை உடையவர். இவ்வளவு சிறப்புள்ள சிவபெருமானுடைய ஊர் திருப்பனையூராகும்.
சிவபிரான், விளங்கும் முடிபத்தை உடைய இராவணனை அடர்த்தவர். அவன் படும் அல்லல் கண்டு அவனுக்கு அண்ணல் அருள் செய்தார். உலகின்கண் உன்ன உயிர்களுக்கு நீர் நிலம் முதலான பலவற்றையும் படைத்து அளித்த சிவபிரானுடைய ஊர் திருப்பனையூர் ஆகும்.
சிவபிரானிடம் வரங்களைப் பெறுவதற்காக மகிழ்வோடு புறப்பட்டு வரும் அடியவர்களே! அப்பெருமானின் திருமுன் தலைதாழ்த்தி வணங்குகின்றவர்கள் எளிதில் நல்ல வரம் பெறலாம். பிரமனும், திருமாலும் அவனை அறிய மாட்டாத நிலையினன். அப்பரமன் உறையும் ஊர் திருப்பனையூர் ஆகும்.
அழிவில் வல்ல அமணர்களும், பெளத்தர்களும் வாய்த்திறனால் புறங்கூறுகிறார்கள். அதனால், சிறிதும் குறைவுறாத செம்மையன் ஆகிய சிவபிரானது ஊர் திருப்பனையூர் என்ற தலமாகும். அத்தலத்தில் பழியற்றவர்கள் சேர்ந்து வாழ்கிறார்கள்.
விடையூர்தியைக் கொண்ட சிவபிரானை நினைத்தால் மண்ணுலகில் பொருந்தி வாழலாம். அப்பெருமான் உறையும் திருப்பனையூரின்மேல், புகழால்மிக்க தமிழ் ஞானசம்பந்தன், மென்மேலும் விருப்பத்தைத் தருவனவாகப் போற்றிப் பாடிய சொல்மாலைகளான இப்பத்துப் பாடல்களையும் ஒவ்வோர் ஊரிலும் இருந்து கொண்டு நினைவார் உயர்வெய்துவர்.