சிவபிரான், ஒருகலைப் பிறைமதியோடு, வலிய கங்கைநீரும் நிலையாகப் பொருந்திய சடையை உடையவர். மலையில் இருந்து கொணர்ந்த முத்துக்கள் சிறந்த மணிகள், சந்தனம் ஆகியவற்றை அள்ளிவரும் அலைகளை உடைய காவிரியாறு பாயும் திருவையாறு சிவபிரானுடைய இடமாகும்.
பொருள்: சிவபிரான், பிறைமதி பொருந்திய சடையில் கொன்றை மாலையை அணிந்தவன். தக்க யாகத்தில் வீரபத்திரரை ஏவிச் சந்திரனைக் காலால் பொருந்த உதைத்தவன். மதியோடு சேரும் கொடிகளைக் கொண்டதும், மதி தங்குமாறு உயர்ந்த மாடவீடுகளை உடையதுமான திருவையாறு சிவபிரான் வாழும் இடமாகும்.
சிவபிரான், எட்டுத்திசைகளிலும் வாழும் தேவர்களால் வணங்கப் பெறுபவர். அவர் சங்கு மணிகள் கட்டிய இடையினை உடையவர். கொக்கிறகு என்னும் மலரோடு, வன்னிப் பச்சிலைகளும் பொருந்திய சடைமுடியை உடைய அப்பெருமானுக்கு உரிய இடம் திருவையாறு ஆகும்.
சிறகுகளோடு கூடிய முப்புரங்களும் அழியச் சினந்தவராகிய சிவபிரான் விரும்பும் கோயில் இருவையாறு ஆகும். அங்கு மக்களுடைய கண்களுக்குப் புலனாகாது மறைந்து இயங்கும் நல்ல தேவர்கள் தங்களுக்குள் பேசிக்கொள்ளும் ஒலி நிறைந்துள்ள இடமாக அத்தலம் இருக்கிறது.
உமையம்மையை ஒரு பாகத்தே விளங்கப் பொருந்தியவரான சிவபெருமான் சாரும் இடம் திருவையாறு என்ற தலமாகும். அது மலையிடையே உள்ள மூங்கில்கள் முத்துக்களைச் சொரிய, அவை காவிரியாற்றில் பொருந்தி வரும் குளிர்ந்த தலமாகும்
தலையோட்டினால் தொகுக்கப்பட்டுள்ள மாலையை அணிந்து, மானைக் கையிலே கொண்டவராகிய சிவபிரானுடைய இடம் திருவையாறு என்ற தலமாகும். அது, இறைவனுடைய திருவடிக்கண் நிலைத்த மனமுடையவராகிய அடியவர்கள் நாள்தோறும் மலர்கொண்டு, தூவி, வழிபாடு செய்யும் திருத்தலமாகும்.
வரங்கள் பல பெற்றுத் தாமரை மலர்மேல் விளங்கும் பிரமனின் தலைகளில் ஒன்றை அறுத்த சிவபிரானுக்குரிய இடம் திருவையாறு என்ற. தலமாகும். அது, மலையினின்று பொங்கிப் பெருகிவரும் காவிரியாறு ஓசையோடு ஆரவாரித்து வரும் திருத்தலம் ஆகும்.
கயிலை மலையைப் பெயர்த்த இராவணனுடைய சிரங்களும், பிற உறுப்புகளும் சிதறுமாறு நெரித்த சிவபிரான் எழுந்தருளிய இடம் திருவையாறு என்ற தலமாகும். அது மணம் பொருந்திய மலர்களைக் கொண்டு, புண்ணிய ஆறாகிய காவிரி அலைகளோடு கூடிப் பாய்ந்து வளம் சேர்க்கும் திருத்தலம் ஆகும்.
சங்கத்தைக் கையின்கண் கொண்ட திருமாலும், அறியாதவாறு பொங்கி எழும் சுடராகத் தோன்றிய சிவபிரான் கோயில் கொண்ட இடம் திருவையாறு ஆகும். அது, காவிரி மகரந்தம், தேன் ஆகிய பொலியும் நீரைக் கொண்டு வந்து, அழல் வடிவான இறைவன் திருமுன் அர்க்கியமாகக் காட்டும் திருத்தலம் ஆகும்.
துவராடை தரித்த பெளத்தர்கள், ஆடையின்றித் தோலைக்காட்டும் சமணர்கள் . ஆகியவர்களின் மாறுபட்ட வாய்மொழிகளை கேட்காமல், தவத்தால் மேம்பட்டவர்கள், பிரமன் முதலிய தேவர்கள் வந்து அணைந்து வழிபடும் தலமாகிய திருவையாறு சென்று வழிபடுமின்.
கலைவல்லவர்களின் ஆரவாரம் மிக்க சீகாழிப் பதியில் உள்ளவர்களுக்குத் தலைவனாக நன்மை அமைந்த ஞானசம்பந்தன் விளங்குகிறார். அவர், அலைகளை உடைய காவிரியில் சூழப்பட்ட திருவையாற்றைப் போற்றிப் பாடிய இத்தமிழ்ப்பாடல்கள், பாடுவோரின் துயர் நீங்கும்.