திருவீழிமிழலை

சிவபிரான்‌ 'இடையில்‌ விரிந்த கோவண ஆடையை கட்டியுள்ளார்‌. அவர்‌ வெண்மை நிறம்‌ பொருந்திய விடையூர்தியை விரும்பி ஏற்றுக்‌ கொண்டுள்ளார்‌. மணம்‌ பொருந்திய பொழில்களால்‌ சூழப்பட்டதாகிய திருவீழிமிழலையில்‌ சிவபிரான்‌ உறைகிறார்‌. அந்தப்‌ பதியின்‌ புகழை நூல்களால்‌ உணர்வார்‌ உயர்வடைவார்‌.

சிவபிரான்‌, மலரால்‌ அலங்கரிக்கப்பட்ட முறுக்குகளை உடைய சிவந்த சடைமுடியை உடையவர்‌. அந்த முடியின்மீது ஆரவாரித்து வந்த ஒப்பற்ற கங்கையாற்றை மறைத்து வைத்துள்ளார்‌. சிவபிரான்‌ உறையும்‌ திருவீழிமிழலை தீவினை இல்லாத மக்கள்‌ வாழும்‌ தலம்‌ ஆகும்‌. அந்தத்‌ தலத்தை நினையாதவர்‌ நெஞ்சமும்‌ ஒரு நெஞ்சமோ?

திருவீழிமிழலைத்‌ தலத்தில்‌ அடியவர்கள்‌ நிறைந்துள்ளனர்‌. அவர்கள்‌ அழவல்லவரும்‌, ஆடியும்‌ பாடியும்‌ எழவல்லவரும்‌, எந்தையாகிய இறைவன்‌ திருவடி மேல்‌ விழ வல்லவரும்‌ ஆகிய அடியார்கள்‌ ஆவர்‌. அந்தத்‌ தலத்தைத்‌ தொழவல்லவரே நல்லவர்‌. அவர்‌ தொண்டே நற்றொண்டாம்‌.

அழகனாகிய சிவபிரான்‌, வலிமையை வெளிப்படுத்தி நிற்கும்‌ சிவந்த சடைமுடிமீது பாம்பை அணிந்தும்‌, அதனை இடையில்‌ கட்டியும்‌ உள்ளார்‌. அவர்‌ திருவீழிமிழலையில்‌ எழுந்தருளியுள்ளார்‌. அத்தலம்‌ பொழில்கள்‌ விரவிச்‌ சூழ்ந்துள்ளது. அதனைப்‌ பரவித்‌ துதிக்கும்‌ அடியவரே அடியவர்‌ ஆவார்‌.

நீலகண்டனாகிய சிவபெருமான்‌, கரிதாகிய நஞ்சினை உண்டு, அதனை அணியாக நிறுத்தித்‌ திருவீழிமிழலையில்‌ எழுந்தருளியுள்ளார்‌. அங்கு, வரிகளை உடைய வண்டுகள்‌ ஒலி செய்யும்‌ கொன்றை மரங்கள்‌ நிறைந்த சோலைகள்‌ உள்ளன. அந்த மரங்களில்‌ விரிந்த மாலைகளைப்‌ போலக்‌ கொத்தாகக்‌ கொன்றை மலர்கள்‌ மலர்ந்துள்ளன. இத்தகைய சிறப்பு வாய்ந்த திருவீழிமிழலையைத்‌ தமக்குரிய தலமாகக்‌ கருதுவோர்‌ சிறந்த அடியவர்‌ ஆவார்‌.

சிவபிரான்‌, சடைமிசைச்‌ சூடிய பிறைமதியை உடையவன்‌. இயங்கும்‌ பூதப்‌ படைகளை உடையவன்‌. கொடிமேல்‌ பசிய கண்களை உடைய ஒற்றையேற்றை உடையவன்‌. இத்தகைய சிவபிரான்‌ உறையும்‌ திருவீழிமிழலையை அடைபவர்கள்‌ சிறந்த அடியவர்கள்‌ ஆவர்‌.

சிவபெருமானின்‌ கால்களில்‌ செறிந்த கழலும்‌ சிலம்பும்‌ ஆகிய அணிகள்‌ ஆர்க்கின்றன. அம்மை சுருண்ட கூந்தலை உடையவர்‌. அம்மையோடு நின்றருளும்‌ சிவபிரான்‌ திருவீழிமிழலைத்‌ தலத்தில்‌ எழுந்தருளியுள்ளார்‌. பொழில்களால்‌ சூழப்பெற்றது. அத்தலத்தைத்‌ தியானிப்பவர்‌ அவலம்‌ அறியார்‌. அத்தலம்‌ மணம்‌ கமழும்‌

இராவணன்‌ மிக வருந்திக்‌ கயிலை மலையைப்‌ பெயர்த்தான்‌. அவனுடைய வலிமை கெடுமாறு சிவபிரான்‌ தன்‌ காலை வளைத்து விரலால்‌ ஊன்றினார்‌. அவ்வாறு, வலிமை வாய்ந்த சிவபிரான்‌ திருவீழிமிழலைத்‌ தலத்தில்‌ எழுந்தருளியுள்ளார்‌. விளைவு மிகுந்த வயல்களை உடைய அத்தலத்தை நினைந்து வருபவர்‌ சிறந்த‌ அடியவர்‌ ஆவார்‌.

திருமால்‌ பிரமன்‌ ஆகிய இருவரும்‌ அஞ்ஞானத்தினால்‌ அடிமுடி காணாது மயங்கினர்‌. சிவபிரான்‌ அரிய அழல்‌ உருவாய்‌ வெளிப்பட்டு நின்று வெருட்டினார்‌. பின்பு, அவரே அவர்களுக்கு அருள்‌ செய்தார்‌. அப்பிரான்‌ எழுந்தருளிய திருவீழிமிழலையைச்‌ சிறந்த தலம்‌ என்று தெளிந்தவர்களுடைய தீவினைகள்‌ தேய்தல்‌ உறும்‌.

தடுமாற்றம்‌ உள்ள கொள்கைகளை மேற்கொண்டுள்ள அற்பமானவராகிய அமணர்‌, தேரர்‌ ஆகியோரின்‌ சமயத்‌ தொன்மைச்‌ சிறப்பைக்‌ கருதாதீர்‌. விளங்கும்‌ பொழில்கள்‌ சூழ்ந்த ருவீழிமிழலையை நினைப்பவர்களுடைய வினைகள்‌ ஓய்தல்‌ உறும்‌.

குளிர்ந்த காழிப்பதியில்‌ தோன்றியவர்‌ ஞானசம்பந்தன்‌. தண்மையான சடைமுடியை உடைய சிவபிரானுடைய திருவடிப்‌ பெருமைகளைக்‌ கூறத்‌ தொடங்கினார்‌. விளக்கமான பொழில்கள்‌ சூழ்ந்த திருவீழிமிழலைப்‌ பெருமான்‌ புகழ்‌ கூறும்‌ இப்பதிகப்‌ பாடல்களை ஓதவல்லார்க்குக்‌ கேடு இல்லை.