சிவபிரான், வலிமை பொருந்திய இடபம் பொறிக்கப்பட்ட கொடியைத் தனதாகக் கொண்ட தலைவராவார். கடலால் சூழப்பட்ட சீகாழிப் பதியில், மலர்சூடிய கூந்தலை உடைய உமையம்மையோடு எழுந்தருளி இருக்கிறார். சென்று வழிபடுபவர் தூயநெறியில் நிற்பவர் ஆவார். அந்தத் தலத்தை இடைவிடாது
சிவபிரான், அலைகளோடு கூடிய கங்கையை முடிமிசைச் சூடிய செல்வனாக விளங்குகிறார். கரையை உடைய நீர்நிலைகளால் சூழப்பட்ட சீகாழிப்பதியில் சிவபிரான் மலைமகளோடு மகிழ்ந்து எழுந்தருளியுள்ளான். அந்தச் சீகாழிப்பதியை வரிசையான பூக்களைக் கொண்டு நின்று தூவி வழிபடுமின்.
இறைவனாகிய சிவபிரான், இடியை ஒத்த குரலை உடைய இடபத்தைத் தனது வாகனமாகக் கொண்ட எம் தந்தையாவான். மணம் பொருந்திய பொழில்களால் சூழப்பட்ட சீகாழிப் பதியில் துடிபோலும் இடையை உடைய உமையம்மையோடு எழுந்தருளி இருக்கிறான். அந்த சீகாழிப் பதியை வணங்கும் அடியவர்கள் துன்பத்தை அறியார்கள்.
ஒப்பற்றவனாகிய சிவபிரான், நீலநிற ஒளியோடு கூடிய ஆலகால விடத்தை உண்டருளியவன். பொழில்கள் சூழ்ந்த சீகாழிப் பதியில் உமையம்மையோடு அன்புடன் களிக்கின்றான். அந்த உமையம்மை, வண்டுகள் மணத்தைத் தேடிவந்து நாடும் கூந்தலை உடையவள். உமையம்மையுடன் பெருமான் உறையும் சீகாழிப் பதியைக் கண்டவர்க்கு இன்பம் எளிதாம்.
சிவபிரான், தண்மை பொருந்திய தாமரை மலர்போன்ற திருவடிகளை உடையவன். அவன், உமையம்மையோடு கூடி உலக உயிர்கட்குப் போகத்தைப் புரிந்தருளினும், தான் முனிவனாகவே விளங்குகிறான். கனிகள் குலுங்கும் பொழில்கள் சூழ்ந்த சீகாழிப் பதியில் சிவபிரான் எழுந்தருளியுள்ளான். அந்தப்பதியைச் சென்று கண்டவர்க்குப் பெருமை எளிதாக வந்தடையும்.
சிவபிரான், கொலைத் தொழில் நிறைந்த எமனை உதைத்து அழித்தான். அவன் மலையரையன் மகளாகிய உமையம்மையோடு மகழ்ந்து உறைபவன். அத்தகைய சிவபெருமான் விரும்புவதும், மெய்ஞ்ஞானியர்கள் தொழுது ஏத்துவதும் ஆகிய சீகாழிப் பதியைத் தலையால் வணங்குவார் தலையாயவர் ஆவார்.
சிவபிரான், அழகிய வில்லால் மூவெயில்களையும் எய்தழித்தார். எழில் தவழும் உமையம்மையோடு சீகாழிப் பதியில் எழுந்தருளியுள்ளார். இருண்ட அடர்த்தியான சோலைகளால் சூழப்பெற்ற சீகாழிப் பதியை அடையாதவர்கள், விண்ணுலக இன்பங்களை அடையாதவர் ஆவார்கள்.
சிவபிரான், இராவணனுடைய வலிமை சுருங்குமாறு, அவனைத் தளரச் செய்து அடர்த்தார். அவர் மலைமகளோடு மகிழ்ந்து சீகாழிப் பதியில் விளங்குகின்றார். மேலும் மேலும் பெருகிவரும் நீர் சூழ்ந்த சீகாழிப் பதியை நினைந்து, வரிசையாக மலர்களைத் தூவுமின்.
திருமால் பிரமன் ஆகிய இருவர் பொருட்டு எரி உருவாகி நிமிர்ந்தான் சிவபிரான். அழகிற் சிறந்த பெரியநாயகி அம்மையோடு சீகாழிப் பதியில் எழுந்தருளியிருக்கிறான். கரிய நல்ல கடலின்மணம் கமழும் சீகாழிப் பதியை மனத்தால் நினைய நம் வினைகள் மாய்ந்து பிரியும்.
சமணர்களும், சாக்கியர்களும் புறம் கூறுகின்றனர். அவர்களை ஏறிடாமல் சிவபிரான் உமையம்மையோடு அன்பாய் ஒருசேரச் காழியார் எழுந்தருளி இருக்கின்றான். மணம் கமழ்ந்து நிறையும் பொழில்கள் சூழ்ந்த சீகாழிப் பதியைத் தம்மனத்தே தியானித்து, மலர் தூவித் தொழுதலே சிறந்த தொண்டாகும்.
சீகாழிப்பதி, நன்மையை மக்கட்கு நல்கும். அந்த நகர் மரக்கலங்களை உடைய கடலால் சூழப் பெற்றது. அந்தச் சீகாழிப் பதியை உறுதியாக நினைந்தவர்களும், ஞானசம்பந்தருடைய பாடல்களில் வல்லவராய் ஓதி வழிபட்டவர்களும் விண்ணக இன்பங்களை அடைவர்.