திருப்புகலி

மார்க்கண்டேயருக்கு வயது பதினாறு என்பது விதித்த விதியாக இருந்தது. அதன்‌ காரணமாக மரணநேரம்‌ நெருங்கியது. அவர்‌ இறைவழிபாடு செய்ததன்‌ காரணமாக, விதியின்‌ பயனாய்ச்‌ சிவபிரான்‌ தானே வெளிப்பட்டார்‌. வெளிப்பட்டு மார்க்கண்டேயரை இழுத்துச்‌ செல்லச்‌ சினந்து வந்த கூற்றுவனை உதைத்து அருளினார்‌. அவ்வகைப்பட்ட சிவபிரான்‌ எழுந்தருளிய தலம்‌ திருப்புகலி. அந்தத்‌ தலம்‌ தாமரை மலர்கள்‌ மலர்ந்த நீர்‌ நிலைகளும்‌, தேன்‌ கூடுகள்‌ நிறைந்த பொழில்களும்‌ சூழ்ந்தது ஆகும்‌.

சிவபிரான்‌, பகைவராய்‌ மாறிய அசுரர்களின்‌ முப்புரங்களையும்‌ எரித்து அழித்தார்‌. மின்னல்‌ போன்ற இடையினை உடைய உமையன்னையோடு கூடியவர்‌. அவர்‌ அன்னை உமையோடு சேர்ந்த திருவுருவாய்‌ எழுந்தருளிய இடம்‌ திருப்புகலியாகும்‌. அந்தத்‌ தலம்‌ குளிர்ந்த கடல்‌ ஒரு புறம்‌ சூழ, பொன்‌ போன்ற நெல்மணிகள்‌ நிறைந்த வயல்களை உடையது.

சிவபிரான்‌, கலைகளாகிய வலிமை குறைந்த பிறைமதியைச்‌ செஞ்சடைமீது வைத்துள்ள மணாளன்‌ ஆவார்‌. அவர்‌ புலியின்‌ தோலை இடையில்‌ கட்டிய புனிதன்‌ ஆவார்‌. அவ்வகைப்‌ பட்ட சிவபிரான்‌ விரும்பும்‌ பதி அழகிய திருப்புகலி நகராகும்‌. அங்கு மேம்பட்ட வேதியர்கள்‌ நிறைந்துள்ளனர்‌. மேலும்‌, அது செறிந்து பொலியும்‌ நீர்வளம்‌ சான்றது.

சிவபிரான்‌, கயல்மீன்‌ போன்ற பெரிய கண்களை உடைய உமையம்மையோடும்‌ விடைமீது ஏறி காட்சி தருவார்‌. அவர்‌ அயலார்‌ இல்லங்களில்‌ பலிகொண்டருளும்‌ அழகன்‌ ஆவார்‌. சிவபிரான்‌ விரும்பித்‌ தங்கும்‌ இடம்‌ திருப்புகலி நகராகும்‌. அந்த நகர்‌ எட்டுத்‌ திசைகளில்‌ உள்ளோரும்‌ செவி சாய்த்துக்‌ கேட்கும்‌ இடிஓசையை எழுப்புகின்ற கார்மேகங்கள்‌ தங்கும்‌ கடலை அடுத்துள்ளதாகும்‌.

சிவபிரானுடைய காதுகளில்‌ கனவிய பொன்னால்‌ இயன்ற குழை, தோடு ஆகியன இலங்குகின்றன. அவர்‌, மகரந்தம்‌ மருவிய மலர்களைத்‌ தண்ணிய சடையின்கண்‌ பொருந்தச்‌ சூடியுள்ளார்‌. மேலும்‌ அவர்‌, எல்லா உயிர்கட்கும்‌ நாதனாக விளங்குகிறார்‌. நாள்தோறும்‌ புதிய பூக்கள்‌ நிறைந்து விளங்கும்‌ பொழில்கள்‌ சூழ்ந்த புகலி நகரே சிவபிரான்‌ உறையும்‌ இடமாகும்‌.

சிவபிரான்‌ வெற்றி பொருந்திய சூலப்படை, மான்‌, மழு ஆகியவற்றை ஏந்திய வலிமை உடையவன்‌ ஆவான்‌. அவன்‌ மரக்கலங்கள்‌ உலாவும்‌ கடலிடைத்‌ தோன்றிய நஞ்சினை அமுதாக உண்டவன்‌. அவ்வகைப்பட்ட சிவபிரான்‌ அடியார்‌ குழாத்தோடு உறையும்‌ பதி திருப்புகலி நகராகும்‌. அந்நகர்‌ கொன்றை மலர்கள்‌ பொன்‌ போன்ற இதழ்களையும்‌, மகரந்தங்களையும்‌ சொரியத்‌ தேன்‌ நிலத்தில்‌ பாயும்‌ வயல்கள்‌ உடையது.

சிவபிரான்‌ மும்மதில்களும்‌ கனலால்‌ வெந்தழியுமாறு சினந்தான்‌. அவன்‌ கடலிடை விளங்கத்‌ தோன்றிய நஞ்சை அமுதாக உண்டு, கழுத்தில்‌ தரித்தவன்‌. மேலும்‌ அவன்‌ பிரமனது ஐந்து தலைகளில்‌ ஒன்றை அறுத்து, அதனைக்‌ கையில்‌ தாங்கியவன்‌. அந்தச்‌ சிவபிரான்‌ எழுந்தருளிய இடம்‌ அழகிய திருப்புகலி நகராகும்‌.

தாம்‌ செய்யும்‌ பணிகளால்‌ மேம்பட்ட தொண்டர்கள்‌ கயிலை மலையில்‌ சிவபிரானைத்‌ தோத்திரம்‌ சொல்லிப்‌ போற்றுகின்றனர்‌. அந்தக்‌ கயிலை மலையில்‌ முன்னொரு காலத்தில்‌ இராவணனைச்‌ செற்ற திருவடிகளை உடையவன்‌. அந்தச்‌ சிவபிரான்‌ உறையும்‌ இடம்‌ திருப்புகலி நகராகும்‌. அது தாழை மரங்கள்‌ செறிந்து விளங்கும்‌ பொழில்கள்‌ சூழ்ந்த நகராகும்‌.

சிவபிரான்‌ இறந்தவர்களை எரிக்கும்‌ சுடலையில்‌ விளையும்‌ சாம்பலை உடலில்‌ பூசிக்‌ கொள்கிறார்‌. அந்த மயானத்தில்‌ ஆடும்‌ தலைவராகவும்‌ இருக்கிறார்‌. அவர்‌ திருமால்‌, பிரமன்‌ பொருட்டுத்‌ தம்மேனியை அழல்‌ உருவாக்கி ஓங்கி நின்றார்‌. பாம்பை மாலையாகத்‌ தரித்துள்ள சிவபிரானுடைய நகர்‌ அழகிய திருப்புகலிப்‌ பதியாகும்‌.

பெளத்தர்கள்‌ கீழ்‌ உடையோடு மெல்லிய ஆடையைப்‌ போர்த்துத்‌ திரிவார்கள்‌. அவர்களும்‌, சமணர்களும்‌ கீழ்மக்கள்‌. அவர்கள்‌ பொருந்தாதவற்றைக்‌ கூறுவார்கள்‌. அந்தக்‌ கீழோரின்‌ வேதங்களுக்கு அகப்படாதவன்‌ சிவபிரான்‌. நன்கு செறிந்த பாக்கு மரச்சோலைகள்‌ சூழ்ந்த திருப்புகலி நகரே அந்தச்‌ சிவபிரானது நன்னகர்‌.

சிவபிரான்‌ ஆரவாரிக்கும்‌ கங்கை நீரைத்‌ தமது சிவந்த சடைமீது வைத்துள்ளார்‌. அவர்‌ எம்‌ தலைவர்‌. உயர்ந்த சோலைகளால்‌ சூழப்பட்ட அழகிய திருப்புகலிப்‌ பதி சிவபிரானுக்குரியது. அந்தப்‌ பதியைக்‌ குறித்துத்‌ தமிழ்ஞானசம்பந்தன்‌ உரைத்த அழிய இப்பதிக மாலையைத்‌ தமதாக்கி ஓதும்‌ தொழில்‌ வல்லவர்‌ நல்லவர்‌ ஆவர்‌.