திருப்புன்கூர்

அருளியவர்: திருஞானசம்பந்தர்
பண்: தக்கராகம்
தலம்: புன்கூர்
நாடு: சோழநாடு காவிரி வடகரை

1

முந்தி நின்ற வினைக ளவைபோகச்சிந்தி நெஞ்சே சிவனார் திருப்புன்கூர்அந்தம் இல்லா அடிகள் அவர்போலும்கந்த மல்கு கமழ்புன் சடையாரே.

சொற்பிரிப்பு

முந்தி நின்ற வினைகள் அவை போகச்சிந்தி, நெஞ்சே! சிவனார் திருப் புன்கூர்;அந்தம் இல்லா அடிகள் அவர் போலும்கந்தம் மல்கு கமழ் புன் சடையாரே.

உரை

முற்பிறவிகள்‌ பலவற்றில்‌ செய்த ஆகாமிய வினைகளும்‌ சஞ்சிதமும்‌ உண்கவர்‌ உழன்று பக்குவப்பட்டு, அதன்‌ பின்னர்‌, பிராரத்தம்‌ வரும்‌ காலையில்‌, ஆன்மாக்கள்‌ இப்பிராரத்த வினைகளைப்‌ புசிக்கும்‌ நிலை எய்தும்‌. அந்நிலையில்‌ இப்புசிப்பிற்கு முற்பட்டவை எல்லாம்‌ நீங்குதற்குரிய வழியொன்றுண்டு. திருப்புன்கூரில்‌ சிவபிரான்‌ ஆதி அந்தம்‌ இல்லாத தலைவராயும்‌ மணம்‌ நிறைந்து கமழும்‌ செந்நிறச்‌ சடைமுடி “உடையவராகவும்‌ எழுந்தருளியுள்ளார்‌. அவரை, நெஞ்சே நீ சிந்தை செய்வாயாக. இதுவே வழி, என்றவாறு.

2

மூவ ராய முதல்வர் முறையாலேதேவ ரெல்லாம் வணங்குந் திருப்புன்கூர்ஆவ ரென்னும் அடிகள் அவர்போலும்ஏவின் அல்லார் எயில்மூன் றெரித்தாரே.

சொற்பிரிப்பு

மூவர் ஆய முதல்வர், முறையாலேதேவர் எல்லாம் வணங்கும் திருப் புன்கூர்ஆவர், என்னும் அடிகள் அவர் போலும்ஏவின் அல்லார் எயில் மூன்று எரித்தாரே.

உரை

பகைமை பூண்டவராய அரக்கர்களின்‌ மூன்று அரண்களைக்‌ கணை ஒன்றால்‌ சிவபிரான்‌ எரித்து அழித்தார்‌. அவர்‌, பிரமன்‌, திருமால்‌, உருத்திரன்‌ ஆகிய மூவராயும்‌, அவர்களுக்கு முதல்வராயும்‌ விளங்குகிறார்‌. தேவர்கள்‌ எல்லோரும்‌ முறையாக வந்து வணங்குபவராகவும்‌, திருப்புன்கூரில்‌ எழுந்தருளியுள்ள அடிகள்‌ ஆவார்‌.

3

பங்க யங்கள் மலரும் பழனத்துச்செங்க யல்கள் திளைக்குந் திருப்புன்கூர்க்கங்கை தங்கு சடையா ரவர்போலும்எங்கள் உச்சி உறையும் மிறையாரே.

சொற்பிரிப்பு

பங்கயங்கள் மலரும் பழனத்துச்செங்கயல்கள் திளைக்கும் திருப் புன்கூர்,கங்கை தங்கு சடையார் அவர் போலும்எங்கள் உச்சி உறையும் இறையாரே.

உரை

எங்கள்‌ உச்சியில்‌ உறையும்‌ இறையவர்‌ யாவர்‌? திருப்புன்கூரில்‌, தாமரை மலர்கள்‌ மலரும்‌ வயல்களில்‌ சிவந்த கயல்மீன்கள்‌ திளைத்து மகிழும்‌. அப்படிப்பட்ட திருப்புன்கூரில்‌ கங்கை தங்கிய சடைமுடியராகிய சிவபிரான்‌ எழுந்தருளியுள்ளார்‌. அவரே எம்‌ தலைமேல்‌ உள்ளார்‌.

4

கரையு லாவு கதிர்மா மணிமுத்தம்திரையு லாவு வயல்சூழ் திருப்புன்கூர்உரையின் நல்ல பெருமா னவர்போலும்விரையின் நல்ல மலர்ச்சே வடியாரே.

சொற்பிரிப்பு

கரை உலாவு கதிர் மா மணிமுத்தம்திரை உலாவு வயல் சூழ் திருப் புன்கூர்,உரையின் நல்ல பெருமான் அவர் போலும்விரையின் நல்ல மலர்ச் சேவடியாரே.

உரை

திருப்புன்கூர்‌ வளம்‌ மிக்க வயல்கள்‌ சூழ்ந்த ஊர்‌. ஒளி பொருந்திய சிறந்த மாணிக்கங்கள்‌ கரைகளில்‌ அங்கே திகழ்கின்றன. மேலும்‌, அங்கு முத்துக்கள்‌ நீர்த்திரைகளில்‌ உலாவுகின்றன. அவ்வகைப்பட்ட திருப்புன்கூரில்‌ மணத்தால்‌ மேம்பட்ட தாமரை மலர்‌ போன்ற சிறந்த திருவடிகளை உடைய சிவபிரான்‌ எழுந்தருளியுள்ளார்‌. அவர்‌ புகழ்மிக்க நல்ல பெருமானார்‌ ஆவார்‌.

5

பவழ வண்ணப் பரிசார் திருமேனிதிகழும் வண்ணம் உறையுந் திருப்புன்கூர்அழக ரென்னும் அடிகள் அவர்போலும்புகழ நின்ற புரிபுன் சடையாரே.

சொற்பிரிப்பு

பவழ வண்ணப் பரிசு ஆர் திருமேனிதிகழும் வண்ணம் உறையும் திருப் புன்கூர்அழகர் என்னும் அடிகள் அவர் போலும்புகழ நின்ற புரிபுன் சடையாரே.

உரை

திருப்புன்கூரில்‌ உறையும்‌ சிவபிரான்‌ அழகர்‌ என்னும்‌ அடிகள்‌ ஆவார்‌. உலகோர்‌ புகழும்படி நிலைபெற்றதும்‌, முறுக்கிய சிவந்த முடியையும்‌ உடையவராய்‌ இறைவர்‌ திகழ்கிறார்‌. தமது பவளம்‌ போன்ற மேனியில்‌ செவ்வண்ணம்‌ திகழுமாறு திருப்புன்கூரில்‌ உறைகிறார்‌.

6

தெரிந்தி லங்கு கழுநீர் வயற்செந்நெல்திருந்த நின்ற வயல்சூழ் திருப்புன்கூர்ப்பொருந்தி நின்ற அடிகள் அவர்போலும்விரிந்தி லங்கு சடைவெண் பிறையாரே.

சொற்பிரிப்பு

தெரிந்து இலங்கு கழுநீர் வயல், செந்நெல்திருந்த நின்ற வயல், சூழ் திருப் புன்கூர்ப்பொருந்தி நின்ற அடிகள் அவர் போலும்விரிந்து இலங்கு சடை வெண் பிறையாரே.

உரை

திருப்புன்கூர்‌, கண்களுக்குப்‌ புலனாகும்படி அழகோடு திகழும்‌ செங்கழுநீர்‌ மலர்ந்த வயல்களாலும்‌, செந்நெற்கதிர்கள்‌ அழகோடு நிறைந்து நிற்கும்‌ வயல்களாலும்‌ சூழப்பெற்றது. அந்தத்‌ திருப்புன்கூரில்‌ விரிந்து விளங்கும்‌ சடைமுடியில்‌ வெண்பிறை அணிந்த சிவபிரான்‌ எழுந்தருளியுள்ள அடிகளாவார்‌.

7

பாரும் விண்ணும் பரவித் தொழுதேத்தும்தேர்கொள் வீதி விழவார் திருப்புன்கூர்ஆர நின்ற அடிகள் அவர்போலும்கூர நின்ற எயில்மூன் றெரித்தாரே.

சொற்பிரிப்பு

பாரும் விண்ணும் பரவித் தொழுது ஏத்தும்தேர் கொள் வீதி விழவு ஆர் திருப் புன்கூர்,ஆர நின்ற அடிகள் அவர் போலும்கூரம் நின்ற எயில் மூன்று எரித்தாரே.

உரை

திருப்புன்கூர்‌, மண்ணக மக்களும்‌ விண்ணகத்‌ தேவரும்‌ பரவித்‌ தொழுது ஏத்துமாறு தேரோடும்‌ வீதிகளை உடையது. அது, எந்நாளும்‌ திருவிழாக்களால்‌ சிறந்து திகழ்வது: கொடியனவாய்த்‌ தோன்றி, இடர்‌ விளைத்து நின்ற முப்புரங்களையும்‌ எரித்து அழித்த இறைவர்‌ திருப்புன்கூரில்‌ பொருந்தி நின்ற அடிகளாய்‌ எழுந்தருளியுள்ளார்‌.

8

மலையத னாருடை யமதில் மூன்றும்சிலையத னாலெரித் தார்திருப் புன்கூர்த்தலைவர் வல்ல அரக்கன் தருக்கினைமலையத னாலடர்த் துமகிழ்ந் தாரே.

சொற்பிரிப்பு

மலை அதனார் உடைய மதில் மூன்றும்சிலை அதனால் எரித்தார் திருப் புன்கூர்த்தலைவர், வல்ல அரக்கன் தருக்கினைமலை அதனால் அடர்த்து மகிழ்ந்தாரே.

உரை

சிவபிரான்‌, வலிமை பொருந்திய இராவணனுடைய செருக்கைப்‌ போக்க, அவனைக்‌ கயிலை மலையின்‌ கீழ்‌ அடர்த்தார்‌. இராவணன்‌ தன்‌ செயலுக்கு வருந்தி, மன்னிப்புக்‌ கோரி, வணங்கிப்‌ போற்றிப்‌ பாடினான்‌. அவன்‌ பாடலில்‌ மகிழ்ந்த சிவபெருமான்‌ மன்னித்து அவனுக்கு அருள்‌ வழங்கினார்‌. தேவர்களோடு சண்டையிட்டு, அவர்களை அழிக்கும்‌ குணம்‌ உடையவராய அசுரர்களின்‌ முப்புரங்களை வில்லால்‌ எரித்து அழித்தவராய சிவபிரான்‌ திருப்புன்கூரின்‌ தலைவர்‌ ஆவார்‌.

9

நாட வல்ல மலரான் மாலுமாய்த்தேட நின்றா ருறையுந் திருப்புன்கூர்ஆட வல்ல அடிகள் அவர்போலும்பாட லாடல் பயிலும் பரமரே.

சொற்பிரிப்பு

நாட வல்ல மலரான், மாலும் ஆய்த்தேட நின்றார், உறையும் திருப் புன்கூர்ஆட வல்ல அடிகள் அவர் போலும்பாடல் ஆடல் பயிலும் பரமரே.

உரை

எதனையும்‌ ஆராய்ந்து அறிதலில்‌ வல்லவர்களான நான்முகனும்‌ திருமாலும்‌ தேடி அறிய இயலாதவராய்‌ ஓங்கி நின்றவர்‌ சிவபிரான்‌. அவ்வகைச்‌ சிவபிரான்‌ பாடல்‌ ஆடல்‌ ஆகிய இரண்டிலும்‌ வல்லவராய்‌, அவற்றைப்‌ பழகும்‌ மேலான இறைவர்‌ ஆவார்‌. அப்பெருமான்‌ திருப்புன்கூரில்‌ உறையும்‌ ஆடல்வல்ல அடிகள்‌ ஆவார்‌.

10

குண்டு முற்றிக் கூறை யின்றியேபிண்ட முண்ணும் பிராந்தர் சொற்கொளேல்வண்டு பாட மலரார் திருப்புன்கூர்க்கண்டு தொழுமின் கபாலி வேடமே.

சொற்பிரிப்பு

குண்டு முற்றிக் கூறை இன்றியேபிண்டம் உண்ணும் பிராந்தர் சொல் கொளேல்!வண்டு பாட மலர் ஆர் திருப் புன்கூர்க்கண்டு தொழுமின், கபாலிவேடமே!

உரை

கீழ்மையான தன்மை மிகுந்து, ஆடையின்றி, வீதிகளில்‌ வந்து பிச்சைக்‌ கேட்டுப்‌ பெற்று, அவ்வுணவை விழுங்க வாழும்‌ மயக்க அறிவினராகிய சமணர்கள்‌ கூறும்‌ சொற்களைக்‌ கேளாதீர்‌. தேன்‌ உண்ண வந்த வண்டுகள்‌ பாடுமாறு மலர்கள்‌ நிறைந்து விளங்கும்‌ திருப்புன்கூர்‌ சென்று, அங்கு விளங்கும்‌ கபாலியாகிய சிவபிரானின்‌ வடிவத்தைக்‌ கண்டு தொழுவீர்களாக.

11

மாட மல்கு மதில்சூழ் காழிமன்சேடர் செல்வ ருறையுந் திருப்புன்கூர்நாட வல்ல ஞான சம்பந்தன்பாடல் பத்தும் பரவி வாழ்மினே.

சொற்பிரிப்பு

மாடம் மல்கு மதில் சூழ் காழி மன்,சேடர் செல்வர் உறையும் திருப் புன்கூர்நாட வல்ல ஞானசம்பந்தன்,பாடல்பத்தும் பரவி வாழ்மினே!

உரை

ஞானசம்பந்தப்‌ பெருமான்‌ மாடவீடுகளால்‌ நிறையப்‌ பெற்றதும்‌, மதில்கள்‌ சூழ்ந்ததுமான சீகாழிப்‌ பதிக்குத்‌ தலைவர்‌. அவர்‌ எதையும்‌ நாடி ஆராய வல்லவர்‌. அவர்‌, பெரியோர்களும்‌ செல்வர்களும்‌ வாழும்‌ திருப்புன்கூரில்‌ எழுந்தருளி இருக்கும்‌ இறைவர்மீது பாடிய பாடல்கள்‌ பத்தையும்‌ பரவி நல்வாழ்வு வாழ்வீர்களாக.