திருப்புத்தூர்

திருப்புத்தூர்‌ வளம்‌ நிறைந்தது. அங்கு விரும்பத்தக்க தேன்‌ விம்மிச்‌ சுரக்கின்ற, மணம்‌ நிறைந்த சோலைகள்‌ உள்ளன. சோலைகளில்‌ உள்ள மரங்கள்‌ வானளாவ உயர்ந்துள்ளன. உயர்ந்த மரங்கள்‌ அங்குத்‌ தவழும்‌ திங்களோடு பழகித்‌ திளைக்கின்றன. அவ்வளவு வளமுடைய திருப்புத்தூரில்‌ எழுந்தருளிய சிவபெருமானார்‌ கங்கை தங்கிய சடைமுடியினராகக்‌ காட்டி தருகிறார்‌. அவர்‌ எங்கள்‌ உச்சியில்‌ உறையும்‌ இறைவர்‌ ஆவார்‌.

பன்றி வடிவம்‌ எடுத்த திருமால்‌ உலகை அழிக்கத்‌ தொடங்கினார்‌. அதனைக்‌ கண்ட தேவர்கள்‌ அஞ்சினார்கள்‌. சிவபெருமானிடம்‌ தங்களையும்‌ உலகையும்‌ காப்பாற்ற வேண்டும்‌ என்று வேண்டினார்கள்‌. அவர்களுடைய வேண்டுகோளைப்‌ பெருமான்‌ ஏற்றார்‌. பன்றியை அடக்கி, அதன்‌ பல்லையும்‌ கொம்பையும்‌ தம்‌ மார்பில்‌ அணிந்து கொண்டார்‌. திருப்புத்தூரில்‌ பொழில்கள்‌ அதிகம்‌ உண்டு. அவைகள்‌ வேனிற்காலத்தில்‌ மணத்தை வெளிப்படுத்தும்‌. சோலைகளும்‌ நிறைய உள்ளன. அவைகளில்‌ வாழும்‌ வண்டுகள்‌ தேனை உண்டு திளைத்து ஒலி செய்யும்‌. அவ்வாறு வளம்‌ நிறைந்த திருப்புத்தூரில்‌ சிவபிரான்‌ குறைவின்றி உறைந்துள்ளார்‌.

சிவபிரான்‌, தம்மை அடைக்கலமாக அடைந்த தங்களைத்‌ தவழவிட்ட செந்நிற முடியினை உடையவர்‌. சிவபிரான்‌, தம்முடியின்மிசை தேன்நிறைந்த கொன்றை மலர்களைச்‌ சூடியுள்ளார்‌. நல்ல வரிகளை உடைய வண்டுகள்‌ பக்கங்களில்‌ இருந்து இசைபாடிக்‌ கொண்டே, பெருமான்‌ சூட்டியுள்ள கொன்றை மலரில்‌ திளைக்கின்றன. திருப்புத்தூரில்‌ ஓங்கி உயர்ந்துள்ள கோவிலில்‌ சிவபிரான்‌ எழுந்தருளிய பெருமானார்‌ ஆவார்‌.

சிவபிரான்‌, ஆன்‌ ஏற்றுக்‌ கொடியைத்‌ தனதாகக்‌ கொண்டவர்‌. திருப்புத்தூர்‌ வளம்மிக்கது. மணம்‌ வீசுமாறு சிறந்த நறுமலர்கள்‌ மலர்ந்துள்ளன. வண்டுகள்‌ அவைகளைத்‌ தம்‌ வாயால்‌ கவ்வித்‌ தேனை உண்டு திளைக்கின்றன. சிவபிரான்‌ அந்தத்‌ திருப்புத்தூரில்‌ பலகாலம்‌ தங்கிய வாழ்க்கையினை உடையவர்‌ ஆவார்‌.

திருப்புத்தூர்‌ புகழ்‌ வாய்ந்தது. அது புகழால்‌ விளக்கம்‌ பெற்றது. இயல்பாக அழகு சூழ்ந்து விளங்குவது. நான்கு திசைகளிலும்‌ பொழில்கள்‌ சூழ்ந்தது. இவ்வகைப்பட்ட திருப்புத்தூரில்‌ சிவபிரான்‌ எழுந்தருளியுள்ளார்‌. கங்கையாகிய பெண்‌ விளங்கும்‌ அழகிய சென்னியை உடையவர்‌. அவர்‌, தம்மை வழிபடுவோர்க்கு அன்பு வளருமாறு பழகும்‌ பெருமானார்‌ ஆவார்‌.

திருப்புத்தூர்‌ தண்ணீர்‌ வளம்‌ மிக்கது. அங்குள்ள மலர்கள்‌ வெள்ளிய நிறம்‌ உடையனவாய்‌ உள்ளன. அவை மணம்‌ பொருந்தியவை. அங்குத்‌ தெளிந்த தன்மை உடையதாய்‌ உள்ள தண்ணீர்‌, அந்த மலர்களை அடித்துக்‌ கொண்டு பாயும்‌ வளம்‌ வாய்ந்தது. அந்தத்‌ திருப்புத்தூரில்‌ எழுந்தருளியுள்ள சிவபெருமான்‌ பேரொளிப்‌ பிழம்பானவர்‌. இவர்‌ வெண்மை நிறமுடைய விடை உருவம்‌ எழுதிய கொடியை உடையவரும்‌ ஆவர்‌.

திருப்புத்தூர்‌ வயல்வளம்‌ நிறைந்தது. அங்கு நெய்தல்‌, ஆம்பல்‌, செங்கழுநீர்‌ ஆகிய மலர்கள்‌ வயல்களில்‌ எங்கும்‌ மலர்ந்து, நிறைந்து விளங்கும்‌. சிவபிரான்‌, கருநீலம்‌ பொருந்திய நஞ்சு மருவும்‌ கழுத்தை உடையவர்‌. இவர்‌ திருப்புத்தூரில்‌ உமையொரு பாகம்‌ மகிழ்ந்த சிவனாய்‌ எழுந்தருளியுள்ளார்‌.

திருப்புத்தூர்‌ செல்வம்‌ நிறைந்த செம்மையாளர்கள்‌ வாழும்‌ இடம்‌. திருவிழாக்கள்‌ பல நிகழும்‌ இடம்‌. இங்குள்ள சிவபெருமான்‌, இராவணனாகிய அரக்கனைக்‌ கால்விரலால்‌ தளர அடர்த்தவர்‌. அவர்‌ திருப்புத்தூரில்‌ எழுந்தருளி இருக்கும்‌ வல்லவரான இறைவராவார்‌.

திருப்புத்தூரில்‌, எங்கும்‌ பொருந்தியனவாய்‌ வளரும்‌ இளமயில்கள்‌ தெருக்கள்‌ தோறும்‌ உலவிக்‌ களிக்கின்றன. அங்கு எழுந்தருளியுள்ள இறைவன்‌, பிரமனும்‌ திருமாலும்‌ அறியமுடியாத பெரியோன்‌ ஆவான்‌. அவன்‌ திருப்புத்தூரில்‌ பெருமை பெருகியவனாய்‌ வாழும்‌ பெருமான்‌ ஆவான்‌.

மேல்‌ ஆடையைப்‌ போர்த்துத்‌ திரிதலைத்‌ தொழிலாகக்‌ கொண்ட பெளத்தர்‌, சமணர்‌ ஆகியோருடைய உரைகளை நம்பாதீர்கள்‌. ஆனேறு எழுதிய கொடியினை உடையவராய்த்‌ திருப்புத்தூரில்‌ நான்கு வேதங்களாகவும்‌, ஆறு அங்கங்களாகவும்‌ விளங்கும்‌ சிவபெருமானைத்‌ தெளிமின்கள்‌.

செல்வரும்‌, உயர்ந்தவருமான சிவபெருமான்‌ உறையும்‌ திருப்புத்தூரை, நன்மை தரும்‌ வேதங்களை உணர்ந்த ஞானசம்பந்தன்‌ அடைந்து, வழிபட்டுச்‌ சொல்லிய பத்துப்‌ பாடல்களையும்‌ ஓத வல்லவர்களுக்குத்‌ துன்பங்கள்‌ நீங்கும்‌. எக்காலத்திலும்‌ அவர்களை அவலம்‌ அடையா.