சீகாழி

பாடல்களின்‌ சொல்லும்‌ பொருளுமாகக்‌ கலந்து நிற்கும்‌ பரமன்‌ சிவபிரான்‌. அவரைச்‌ சீகாழிப்‌ பதியினர்‌, “கொன்றைப்‌ பூக்கள்‌ பொருந்திய, முறுக்கேறிய செஞ்சடையினை உடைய ஈசா! எங்களைக்‌ காவாய்‌' என நின்று துதித்துப்‌ போற்றுகிறார்கள்‌. அந்தச்‌ சிவபிரானே, மனம்‌ ஒன்றாத அரக்கர்களின்‌ மூன்று புரங்களையும்‌ அழித்தார்‌.

சிவபிரான்‌ அந்திக்‌ காலத்தில்‌ நடனம்‌ ஆடும்‌ அடிகள்‌ ஆவார்‌. தேவர்கள்‌, “எந்தையே” என்று அன்போடு அழைப்பர்‌. ஆலயத்துள்‌ புகுந்து குழுமுவர்‌. மணம்‌ மிக்க மாலைகளை அணிவித்தல்‌ பொருட்டுச்‌ சேருவர்‌. அவர்களால்‌ மாலை அணிவிக்கப்‌ பெறும்‌ சிவபிரான்தான்‌ சீகாழிப்பதியார்‌ ஆவார்‌. குற்றமற்றவரான அவரே நன்றாகச்‌ சுட்டு எடுத்த திருநீற்றை அணிந்தவர்‌ ஆவார்‌.

சிவபிரான்‌ முற்றிய இன்பத்தோடு ஆடுகின்றார்‌. இனிப்பில்‌ தேனை வென்று விளங்கும்‌ மொழிகளைப்‌ பேசுகின்ற உமையம்மையை ஒருபாகமாகக்‌ கொண்டவர்‌. காட்டில்‌ திரியும்‌ இயல்பினதாகிய மானைக்‌ கையில்‌ ஏந்தி அவர்‌ விளங்குகிறார்‌. அவரே சீகாழிப்பதியில்‌ உறையும்‌ இறைவன்‌ ஆவார்‌. அவர்‌ வானளாவிய உயர்ந்த திருக்கோவிலில்‌ விளங்குபவர்‌ ஆவார்‌.

சிவபிரான்‌, தம்மைப்‌ பேணி வழிபடாத அசுரர்களின்‌ முப்புரங்களை அழித்தவர்‌. மாட்சிமை இல்லாத வெற்றியை உடைய காலனை மடியுமாறு செய்தவர்‌. தம்மை அன்றி வேறொன்றையும்‌ காணாத மார்க்கண்டேய முனிவருக்கு என்றும்‌ பதினாறு ஆண்டோடு விளங்கும்‌ வரத்தை அளித்து அருளியவர்‌. அவரே, சீகாழிப்‌ பதியில்‌ உறையும்‌ இறைவன்‌ ஆவார்‌. அந்தச்‌ சிவபிரானே, முப்புரங்களை அழித்தற்பொருட்டு நாணில்‌ பூட்டிய அம்பைத்‌ தொடுத்தவரும்‌ ஆவார்‌.

குற்றம்‌ பொருந்திய அசுரர்களின்‌ புரங்கள்‌ மூன்றையும்‌ எரித்து அருளியவர்‌ சிவபிரான்‌. அருகில்‌ உள்ள கடல்நீரின்‌ அலைகளால்‌ எறியப்பட்ட சங்குகள்‌, வயல்களில்‌ விளைந்த செந்நெற்பயிர்களுடைய செறிவில்‌ ஏறி முத்துக்களை ஈனும்‌. அந்த அளவு சீகாழி செழிப்புள்ளது. அங்குச்‌ ஏவபிரான்‌ சீகாழிப்‌ பதியினராக விளங்குகிறார்‌. அவர்‌ வாடாமலர்களைச்‌ சூடி விளங்கும்‌ பார்வதி தேவியைத்‌ தம்‌ திருமேனியின்‌ ஒரு பங்காக உடையவர்‌ ஆவார்‌.

சிவபிரான்‌, சிவந்த கண்களை உடைய அரக்கர்‌ மூவருடைய திரிபுரங்களை எரித்தார்‌. அவர்‌ கோங்கு, செருந்தி கொன்றை மலர்‌ இவற்றுடன்‌ தம்முடைய சடைமுடியில்‌ கங்கையை அணிந்துள்ளார்‌. சீகாழி நகரில்‌ விரும்பி உறைந்த காரணத்தால்‌ அவரே காழியார்‌ எனப்படுவார்‌. அச்சிவபிரான்‌ சீகாழியில்‌ விருப்பமாகத்‌ தங்க, தாம்‌ அணிந்துள்ள பாம்புகளை உடல்‌ உறுப்புக்களில்‌ வைத்து ஆட்டி வருபவராகவும்‌ உள்ளார்‌.

பரமராகிய சிவபிரான்‌ எல்லா இடங்களிலும்‌ நிறைந்து விளங்கும்‌ பெருமானார்‌ ஆவார்‌. முல்லை நிலத்துக்குரிய ஆன்‌ ஏற்றில்‌ ஊர்ந்து, அதன்‌ முன்னே பூதகணங்கள்‌ வளைந்து நெளிந்து ஆடிச்‌ செல்லக்‌ கல்லவடம்‌ என்றொரு வகைப்‌ பறையின்‌ ஒலியை விரும்புபவர்‌. €காழியில்‌ விரும்பி உறைகின்ற காரணத்தால்‌ அவர்‌ காழியார்‌ ஆவார்‌. தம்மை அறிந்து போற்றுநர்‌ அல்லாதார்‌ இருக்கும்‌ இடங்களிலும்‌ தோன்றி, உயர்வு தாழ்வு கருதாது அருள்‌ வழங்கும்‌ இயல்பினர்‌.

சிவபிரான்‌, பொடியாக அமைந்த திருநீற்றைப்‌ பூசும்‌ தூயவர்‌. கயிலை மலையை இராவணன்‌ எடுத்தான்‌. அவனுடைய முடிகள்‌ நெரியுமாறு தம்‌ கால்‌ விரலை ஊன்றிச்‌ சினந்தார்‌. அவனுடைய ஆற்றல்‌ அழியுமாறு அடர்த்தவர்‌; காழியாராகிய சிவபெருமான்‌. ஆனால்‌, இராவணன்‌ எடுத்த பாடலாகிய சாமகானத்துக்கு இரங்கி அருள்செய்தவர்‌ ஆவார்‌.

வாழ்நாளைக்‌ கூறுபடுத்திக்‌ கணக்கிட்டு உயிர்‌ கொள்ளும்‌ இயமன்‌ அஞ்சுமாறு அவனை உதைத்து மார்க்கண்டேயருக்கு அருள்‌ செய்த குழகர்‌ சிவபிரான்‌ ஆவார்‌. ஆற்றல்‌ உடைய திருமாலும்‌, பிரமனும்‌ அவருடைய அடிமுடிகள்‌ தோன்றும்‌ இடங்களைக்‌ காணாதவாறு வானுற ஓங்கிய வெற்றியை உடையவர்‌. அவர்‌ விருப்பத்துடன்‌ காழிப்பதியில்‌ எழுந்தருளியுள்ளார்‌. அவர்‌ மிக உயர்ந்த ஆன்‌ ஏற்றில்‌ ஏறி, உலா வந்து அருள்‌ புரிபவர்‌ ஆவார்‌.

தாமரை மலரின்‌ அரும்பு போன்ற தன பாரங்களை உடைய உமையம்மையை ஒரு பங்காகக்‌ கொண்டுள்ளவர்‌ தலைவராகிய சிவபிரான்‌. காழியில்‌ எழுந்தருளியுள்ள அவர்‌, உண்மையின்றி மிகப்‌ பிதற்றுகின்ற சமணர்‌ சாக்கியர்களின்‌ வஞ்சக உரைகளைக்‌ . கொள்ளாதவர்‌. அவரே, இருக்கு வேதத்தில்‌ நிறைந்துள்ள இறைவரும்‌ ஆவார்‌.

கோமானாகிய சிவபிரான்‌, நீர்வளத்தால்‌ கருஞ்சேறு பட்டு விளங்கும்‌ வயல்களால்‌ சூழப்பட்ட சீகாழிப்பதியில்‌ விளங்குகிறார்‌. அவர்மீது, சிறப்புப்‌ பொருந்திய ஞானசம்பந்தன்‌ பாடல்களை அருளிச்‌ செய்துள்ளார்‌. அவற்றை ஓதிப்‌ போற்றித்‌ துதிக்க வல்ல உலகோர்‌, அழகிய வானகத்தில்‌ இனிதாக இருப்பர்‌ (உலகர்‌ போற்றிப்‌ புகழுமாறு பரவ வல்லவர்கள்‌).