திருச்சிவபுரம்

விண்‌, தீ, காற்று, நீர்‌, மண்‌ ஆகிய ஐம்பூதங்களைப்‌ பற்றியும்‌, அறுபத்து நான்கு கலைகளைப்‌ பற்றியும்‌ வேதங்கள்‌ விரித்துக்‌ கூறுகின்றன. சத்துவம்‌, இராஜசம்‌, தாமசம்‌ ஆகியவை மூன்று குணங்கள்‌. தாசமார்க்கம்‌, சற்புத்திரமார்க்கம்‌, சகமார்க்கம்‌, சன்மார்க்கம்‌ ஆகியவை விரும்பத்தக்க மார்க்கங்கள்‌ (அல்லது) சரியை, கிரியை, யோகம்‌, ஞானம்‌ ஆகியவை விரும்பத்தக்க மார்க்கங்கள்‌. தேவர்‌ முதலாகத்‌ தாவரம்‌ ஈறாக உள்ள அனைத்து உயிர்களுக்கும்‌, அவைகளுடைய வினைக்கு ஈடாகப்‌ பிறவிகள்‌ அருளப்படுகின்றன. படைக்கும்‌ தொழிலில்‌ நல்ல தாமரை மலரில்‌ விளங்கும்‌ நான்முகனை இடமாகக்‌ கொண்டு அதிட்டித்து) நின்று சிவபெருமான்‌ உலகைத்‌ தோற்றுவித்து அருளுகிறான்‌. அந்தச்‌ சிவபெருமானுடைய சிவபுரத்‌ தலத்தை நினைப்பவர்கள்‌ வளம்‌ நிறைந்த இந்த உலகில்‌ நிலைபெற்று வாழ்வார்கள்‌.

இந்த மண்ணுலகில்‌ மலைகளும்‌ வளங்களும்‌ வளர்ந்து கொண்டு இருக்கின்றன. வேதங்கள்‌ கூறும்‌ விதிகளின்படி நடந்து காட்டும்‌ மிகுதியான மக்கள்‌ வாழ்கிறார்கள்‌. விண்ணுலகத்தில்‌ வாழும்‌ தேவர்களும்‌ மற்றுமுள்ள உலக உயிர்களும்‌ நிலைபெற்று வாழ்வதற்குரிய காத்தல்‌ தொழில்‌ இன்றியமையாதது. மிகுந்து வரும்‌ அலைகளை உடைய திருப்பாற்கடல்‌ நடுவில்‌ அரிதுயில்‌ கொண்டுள்ள திருமாலைக்‌ காத்தல்‌ தொழில்‌ செய்வதற்காகச்‌ சிவபெருமான்‌ இடமாகக்‌ கொண்டுள்ளான்‌. அவன்‌ வழியாகக்‌ காத்தல்‌ தொழிலைச்‌ சிவபெருமான்‌ செய்தருளுகிறான்‌. கற்களால்‌ கட்டப்பட்ட மதில்கள்‌ சூழ்ந்த திருச்சிவபுரம்‌ சிவபெருமான்‌ உறையும்‌ பதியாகும்‌. அதனை நினைப்பவர்‌ திருமகளோடு திகழ்வர்‌.

இந்த நிலவுலகம்‌ பழுதுபடாத கடலால்‌ சூழப்பட்டது. இந்த நிலவுலகம்‌ உட்பட எல்லா உலகங்களிலும்‌ மனநிறைவுடன்‌ தேவர்கள்‌, நரகர்கள்‌, மனிதர்கள்‌ சேர்ந்து வாழ்கின்றனர்‌. இவர்கள்‌ அனைவருடைய உயிர்களையும்‌ ஒடுக்கும்‌ நினைவோடு, அதில்‌ உருத்திரனை இடமாகக்‌ கொண்டு (அதிட்டித்து), அவனுடைய உருவில்‌ தானே செய்தருள்கிறான்‌. செழுமையான மணிகளால்‌ அழகு செய்யப்படும்‌ திருச்சிவபுர நகரில்‌ அவன்‌ உறைகிறான்‌. அந்த நகரைத்‌ தொழுபவர்களுடைய புகழ்‌ உலகில்‌ மிகும்‌.

சிவ பரம்பொருளை வழிபடும்‌ அன்பர்கள்‌ மணம்‌ மிகுந்த சந்தனம்‌, நிறைந்த நீர்‌ ஆகியவற்றைக்‌ கொண்டு நன்னீராட்டுவார்கள்‌. அரும்புகள்‌, இதழ்‌ விரிந்த மலர்கள்‌ ஆகியவற்றால்‌ மலர்‌ சூட்டுவார்கள்‌. குங்கிலியம்‌, சீதாரி முதலியவற்றால்‌ நறும்புகை அளிப்பர்‌. ஒளிவளர்‌ தீபங்கள்‌ கொண்டு ஒளி காட்டுவர்‌. இவ்வாறு சிவபெருமானை நாள்தோறும்‌ நினைவோடு வழிபடும்‌ அடியவர்களுக்கு அவன்‌ குறைவில்லாததும்‌, நிறை உடையதுமான சாமீபம்‌ முதலான முத்தகளை அடைய அருள்‌ செய்வான்‌. நீர்‌ நிலைகள்‌ பலவற்றாலும்‌ வளம்‌ நிரம்பி விளங்கும்‌ அழகிய பதி திருச்சிவபுரமாகும்‌. அன்பர்களுக்கு அருள்‌ செய்யும்‌ குணம்‌ உடைய சிவபெருமான்‌ அங்கு உறைகிறான்‌. அந்த ஊரை நினைவில்‌ கொண்டு அங்குள்ள இறைவனை வழிபாடு செய்பவர்கள்‌ வெற்றித்‌ திருமகளின்‌ தலைவர்கள்‌ ஆவார்கள்‌.

யோகியர்களுக்குச்‌ சிவபெருமான்‌ அருளும்‌ நிலை கூறப்படுகிறது. காமம்‌, குரோதம்‌, லோபம்‌, மோகம்‌, மதம்‌, மாற்சரியம்‌ எனப்படும்‌ ஆறு பகைகளையும்‌ வென்றவர்கள்‌ யோகியர்‌. மெய்‌, வாய்‌, கண்‌, மூக்கு, செவி ஆகிய ஐம்பொறிகளையும்‌ அடக்கும்‌ வகையில்‌ நிலை நின்றவர்கள்‌ யோகியர்‌. காற்றை நிறுத்தியும்‌, விடுத்தும்‌ செய்யப்டும்‌ பிரணாயாமத்தைப்‌ புரிபவர்கள்‌ யோகியர்‌. ஆழ்ந்து தியானம்‌ செய்வதன்‌ காரணமாக அந்த யோகியர்களுடைய உள்ளத்திலே சிவபெருமான்‌ ஓளிப்‌ பிழம்பாகத்‌ தோன்றி அருளுகிறார்‌. நான்தோறும்‌ உணர்பவர்களாகிய அந்த யோகிகளுக்குத்‌ தனது எழில்‌ உருவாகிய சாரூபத்தைத்‌ தந்தருளும்‌ சிவபெருமான்‌ உறைந்தருளும்‌ நகர்‌ திருச்சிவபுரமாகும்‌. அங்கு மேகம்‌ தவழும்‌ மதில்கள்‌ சூழ்ந்து உள்ளன. அந்த நகரை நினைப்பவர்களுக்குக்‌ கலைமகள்‌ தன்‌ அருளைத்‌ தர வாழ்வார்கள்‌.

அரிய தவத்தை மேற்கொண்ட அடியவர்களின்‌ சிறப்பு இந்தப்‌ பாடலில்‌ சொல்லப்‌ படுகிறது. அரிய தவத்தில்‌ ஒழுகும்‌ அடியவர்கள்‌ வேதங்களையும்‌, பலவித நன்மைகளைத்‌ தரும்‌ தலைமையான கலைகளையும்‌ குற்றமறப்‌ பயின்றவர்கள்‌. உலகியலில்‌ பழிபாவங்களுக்கு அஞ்சுபவர்கள்‌. தூய ஒழுக்க சிலராய்‌ உலகம்‌ புகழ விளங்குபவர்கள்‌. உடலின்கண்‌ உள்ள பொறிகள்‌ வழிஒழுகாது அரிய தவத்தை மேற்கொள்பவர்கள்‌. அந்த அடியவர்கள்‌ தன்‌ திருவடிகளை அடையும்‌ வகையில்‌, அவர்களுக்கு வழிகாட்டும்‌ சிவபெருமான்‌ உறையும்‌ பதி திருச்சிவபுரமாகும்‌. அந்த நகரில்‌ திருவருள்‌ தேங்கியுள்ளது. அந்தத்‌ தலத்தை நினைப்பவர்களுடைய குலம்‌ விளக்கம்‌ அடையும்‌. அந்தக்‌ குலம்‌ உலகில்‌ நிலைபெற்றுத்‌ இகழும்‌. சாயுச்சிய நிலை அளிப்பதை இப்பாட்டு தெரிவிக்கிறது.

திருமால்‌ வராக அவதாரம்‌ எடுத்தபோது பணிந்த இடம்‌ என்பதை இப்பாட்டு தெரிவிக்கிறது. திருமால்‌ வராக அவதாரம்‌ எடுத்தபோது சினம்‌ மிக்க கரிய உருவத்தோடு விளங்க‌. வராக அவதார உருவம்‌ மிகப்‌ பெரிதாக இருந்தது. அவருடைய நகங்களுக்கு இடையே வடக்கின்கண்‌ உள்ள மேருமலை கணகணவென ஒலி செய்தது. மதம்‌ மிக்க நீண்ட பெரிய உருவமான அந்த வராகத்தின்‌ முகத்தில்‌ பிறைநிலவு போன்ற கோரமான பல்‌ (எயிறு) விளங்கியது. அந்த எயிற்றின்‌ முனையில்‌ பூமி இதமாக அமர்ந்து விளங்கியது. அந்தப்‌ பூமியை உலகின்கண்‌ அழியாது நிறுத்திக்‌ காத்தவர்‌ அழகிய திருமால்‌. அவர்‌ வழிபட, அவருக்கு அருள்புரிந்த திருவடிகளை உடையவனாகிய சிவபெருமான்‌ எழுந்தருளியுள்ள இடம்‌ திருச்சிவபுரம்‌. அந்த ஊரை நினைப்பவர்‌ உலகில்‌ புகழோடு விளங்குவார்‌.

இராவணன்‌, உடலை வருத்திக்‌ கொண்டு நான்முகனை நோக்கித்‌ தவம்‌ செய்தான்‌. அவனுடைய தவத்தை மெச்சி, அவன்‌ விரும்பியபடியே மிகப்‌ பெரிய உடல்‌ வலிமையைக்‌ கொடுத்தான்‌. கிடைத்த வலிமையைக்‌ கொண்டு, . சிவபிரான்‌ எழுந்தருளிய கயிலை மலையை, அது பெயரும்‌ வகையில்‌, தன்‌ இருபது கரங்களை இராவணன்‌ அம்மலையின்‌ கீழ்ச்‌ செலுத்தினான்‌. இராவணனுடைய பத்துத்‌ தலைகளில்‌ உள்ள முடிகள்‌ சிதறுமாறு, தனது ஒரு கால்விரலால்‌ அடர்த்துத்‌ தன்‌ வலிமையைச்‌ சிவபிரான்‌ அவனுக்கு உணர்த்தி, அவனைப்‌ பணிகொண்டு அருளினான்‌. அந்தச்‌ சிவபிரான்‌ உறையும்‌ பதி எட்டுத்‌ இசைகளிலும்‌ புகழ்‌ நிறைந்த திருச்சிவபுரம்‌ ஆகும்‌. அந்தத்‌ தலத்தை நினைப்பவர்‌ வளமான இந்த உலகில்‌ எஞ்ஞான்றும்‌ இன்பமாக வாழ்வர்‌.

அறிந்து சொல்வதற்கு இயலாத வகையில்‌ அழல்‌ மிக்க பேரொளிப்‌ பிழம்பாய்‌ சிவபிரான்‌ வெளிப்பட்டருளினார்‌. வலிமைமிக்க சக்கராயுதத்தைப்‌ படைக்கலமாகக்‌ கொண்ட திருமாலும்‌, நான்முகனும்‌ அந்தப்‌ பேரொளிப்‌ பிழம்பைக்‌ கண்டு அச்சம்‌ கொண்டு துதி செய்தனர்‌. துதி செய்த அளவில்‌ அவர்களுக்கு எதிரே விடம்‌ பொருந்திய கண்டமும்‌, நெற்றிக்‌ கண்ணும்‌ உடைய தனது உருவத்தோடு சிவபிரான்‌ காட்சி நல்கினான்‌. அந்தச்‌ சிவபிரான்‌ எழுந்தருளிய தலம்‌ உறுதியான மரங்கள்‌ செறிந்த பொழில்களால்‌ எழில்பெற்ற திருச்சிவபுரம்‌ ஆகும்‌. அதனை நினைபவரும்‌, அவருடைய மரபினரும்‌ உலகில்‌ புகழோடு விளங்குவர்‌.

கேட்டிற்குக்‌ காரணமான அறிவினை உடையவராகிய பெளத்தர்களும்‌, தமது கையில்‌ நிறைந்த உணவினை வாங்கி உண்ணும்‌ சமணர்களும்‌ பின்வருமாறு கூறுகின்றனர்‌. குணங்களும்‌ அறிவும்‌ நிலையில்லாதன. காணப்படும்‌ உலகப்‌ பொருள்களும்‌, உரைக்கும்‌ உரையால்‌ உணர்த்தப்படும்‌ ஏனைய பொருள்களும்‌ அவ்வாறே அழிந்து தோன்றும்‌ இயல்பின. இது திண்ணம்‌. இவ்வாறு கணபங்க வாதத்தைப்‌ பேசும்‌ பெளத்தர்களும்‌, குற்றம்‌ பொருந்திய அறிவுடைய சமணர்களும்‌ உணர்தற்கரிய சிவபிரான்‌ உறையும்‌ பதி திருச்சிவபுரம்‌ ஆகும்‌. இவ்வுலகில்‌ நல்லவர்கள்‌ பலர்‌ வாழும்‌ ஊர்‌ அது. அதனை நினைபவர்‌ அழகிய உருவோடு விளங்குவர்‌.

இவ்வுலகில்‌ புகழால்‌ விளங்கும்‌ நகர்‌ திருச்சிவபுரம்‌. அந்த நகரில்‌ எழுந்தருளியுள்ள சிவபிரானடைய திருவடி இணைகளைப்‌ பணிகின்றவர்‌ ஞானசம்பந்தர்‌. அவர்‌ திருச்சிவபுர நகர்‌ எனப்படும்‌ சீகாழித்‌ தலைவனும்‌, தமிழ்‌ விரகனும்‌ ஆவார்‌. அந்த ஞானசம்பந்தன்‌ பாடிய உரைச்‌ சிறப்பு வாய்ந்த இந்தத்‌ திருப்பதிகப்‌ பாடல்கள்‌ பத்தினையும்‌ ஓதி வழிபட வேண்டும்‌. அவ்வாறு ஓதி வழிபடுபவர்கள்‌ குலம்‌, நிலம்‌, நிறைந்த செல்வம்‌, அழகிய வடிவம்‌, ஒப்பற்ற கொடை வண்மை, மிக்க வெற்றித்தரு, இந்த உலகிடை தொடர்ந்து வரும்‌ மரபினர்‌; இறைவனடியார்‌ என்ற பெருமிதம்‌ ஆகியன தம்பால்‌ விளங்க எல்லா நலங்களும்‌ மிகப்‌ பெறுவர்‌.