திருநின்றியூர்

சிவபெருமான்‌ திருநின்றியூரில்‌ நிலையாக எழுந்தருளியுள்ளான்‌. அவ்வூரில்‌ மணம்‌ கமழும்‌ நீலமலர்கள்‌ மலர்ந்த பொய்கைகள்‌ பல உள்ளன. சிவன்‌ முன்னொரு காலத்தில்‌ காலனின்‌ வலிமையைக்‌ காலால்‌ உதைத்துப்‌ போக்கினவன்‌. இவனுக்குப்‌ படைக்கலம்‌ “சூலம்‌. சுண்ணப்பொடியும்‌, சந்தனமும்‌ ’திருநீறே'. பால்போலும்‌ வெண்மையான பிறைமதி அவனது செந்நிறச்‌ சடைமுடியின்‌ மேல்‌ உள்ளது.

திருநின்றியூரில்‌ எழுந்தருளி விளங்கும்‌ சிவபெருமான்‌ நஞ்சை மிடற்றிலே நிறுத்தித்‌ தேவர்களைக்‌ காத்து அருளியவர்‌. மணம்‌ கமழும்‌ கொன்றை மலர்களை விரும்பிச்‌ சூடியவர்‌. தம்மை வழிபடும்‌ அடியவர்களை ஆட்கொண்டருளும்‌ அன்புடையவர்‌. அவரது பாதம்‌ பணிவார்‌ அச்சம்‌, பாவம்‌, கேடு, நாள்தோறும்‌ வரும்‌ நோய்‌ ஆகியன இலராவர்‌.

திருநின்றியூரில்‌ உறையும்‌ சிவபெருமான்‌ நிறைந்த கங்கைப்‌ புனலைச்‌ சடைமிசை உடையவர்‌. அவ்வூரில்‌ பறையடிக்கும்‌ ஒலி, சங்கு முழங்கும்‌ முழக்கம்‌, ஊரின்‌ எல்லாப்‌ பக்கங்களிலும்‌ மிகவும்‌ ஒலிக்கும்‌ ஏனைய ஒலிகள்‌, ஆகிய யாவும்‌, இறைவனது நாத தத்துவத்தை உணர்த்துகின்றன என்பதை அறிவாளர்கள்‌ உணர்வர்‌. இல்லான்‌ உனையும்‌ சிவபெருமானை அல்லாது என்‌ உள்ளம்‌ வேறு எவரையும்‌ உணராது

வானளாவிய சோலைகள்‌ சூழ்ந்த திருநின்றியூரில்‌ எழுந்தருளிய சிவபெருமான்‌ தனது மலை போன்ற மார்பில்‌ அணிகலன்களைப்‌ பூண்டுள்ளான்‌. முப்புரி நூலை அணிந்து உள்ளான்‌. விரிந்த கொன்றை மலர்‌ மாலையையும்‌ அணிந்து உள்ளான்‌. அதனோடு பொருந்தப்‌ பால்‌ போன்ற வெண்மையான திங்களைத்‌ தன்சடைமேல்‌ சூடி உள்ளான்‌. அவ்விறைவன்‌ திருவடிகளைத்‌ தொழுதல்‌ அல்லது; அவன்‌ இயல்புகளை அடியவர்‌ எவரும்‌ அறியார்‌.

திருநின்றியூரில்‌ குழலின்‌ இசை, வண்டின்‌ இசை ஆகியவற்றைக்‌ கேட்டுக்‌ குயில்கள்‌ கூவுகின்றன. அங்குள்ள சோலைகளில்‌ நிழல்‌ அழகாகத்‌ தங்கி உள்ளது. இவ்வாறு சோலைகளால்‌ சூழப்பட்ட திருநின்றியூரில்‌ விளங்கும்‌ சிவபெருமான்‌ தனது வலத்‌ திருக்கரத்தல்‌ அழலை ஏந்தி, அனலிடை நின்று, தனது திருவடிகளில்‌ அணிந்துள்ள வீரக்கழல்களின்‌ ஒலிகள்‌ கேட்குமாறு ஆடுகின்றான்‌. அவ்வாறு ஆடுகின்ற விரும்பத்தக்க சிவன்தான்‌ நமக்கு என்றும்‌ ஆதாரமானவன்‌.

அழகு மலிந்த, சோலைகள்‌ செறிந்த திருநின்றியூரில்‌ எழுந்தருளிய வீரம்‌ பொருந்திய சிவபெருமான்‌ புன்முறுவலைத்‌ தரும்‌ வெண்மையான பற்களை உடைய உமையம்மையைத்‌ தன்‌ திருமேனியில்‌ ஒரு பாகமாகக்‌ கொண்டுள்ளான்‌. சடைமுடியில்‌ பிறைமதியை வைத்து உள்ளான்‌. அதைச்‌ சார்ந்து கங்கையையும்‌ வைத்துள்ளான்‌. இவனுடைய திருவடிகளை அல்லாது எனது உள்ளம்‌ வேறு ஒன்றையும்‌ உணராது.

திருநின்றியூரின்கண்‌ நிலையாக எழுந்தருளி உள்ள சிவபெருமான்‌ பிரமனது தலைகளில்‌ ஒன்றைக்‌ கிள்ளி, அதனைக்‌ கையில்‌ ஏந்திப்‌ பலி கேட்கும்‌ இயல்பினனாய்த்‌ திரிகின்றான்‌. தேவர்களுக்குத்‌ தலைவனாக விளங்குகின்றான்‌. புலித்தோலைத்‌ தனது இடுப்பில்‌ ஆடையாகச்‌ சுற்றிக்‌ கட்டி உள்ளான்‌. தனது சடைமுடியில்‌ பிறைச்‌ சந்திரனைச்‌ சூடி உள்ளான்‌. நெற்றியில்‌ மூன்றாவதாக ஒரு கண்ணை உடையவன்‌. அவனை நாம்‌ துதிப்போமாக.

நெல்‌ வயல்களால்‌ சூழப்பட்ட திருநின்றியூரின்கண்‌ நிலையாக எழுந்தருளி உள்ள சிவபெருமானே முழு முதற்பொருள்‌ ஆவான்‌ என்றும்‌, அல்லன்‌ என்றும்‌ தருக்கிக்‌ கொண்டு நின்றவர்கள்‌ பிரம்மாவும்‌, திருமாலும்‌ ஆவார்கள்‌. பிரம்மா நல்ல தாமரை மலர்‌ மேல்‌ உறைகின்றவன்‌. உலகத்தைத்‌ தன்‌ வயிற்றகத்து அடக்கிக்‌ காட்டியவன்‌ திருமால்‌. இவர்கள்‌ இருவரும்‌ சிவபிரானது அடி, முடியைத்‌ தேடிக்‌ காண முடியாமல்‌ திகைத்தவர்கள்‌. இவர்களால்‌ காண்பதற்கு அரியவராய்‌ விளங்கியவர்‌ சிவபிரான்‌. அவர்‌ எம்‌ செல்வர்‌. அவருடைய திருவடிகளை அன்றி என்‌ சிந்தை வேறு எதையும்‌ உணராது.

சமணர்கள்‌ நெறியற்ற கீழ்மக்கள்‌. தமக்கென்று உண்மை நெறி எதுவும்‌ இல்லாத புறச்சமயிகள்‌. சமய நெறியில்‌ பயில்வதால்‌ பேராமலும்‌, மறவாமலும்‌ நினைக்கும்‌ முழு முதற்‌ பொருளாகிய சிவபெருமானை அறியக்‌ கூடிய அறிவு இல்லாதவர்கள்‌. இவர்களது அடையாளங்களைக்‌ கருதாமல்‌, திருநின்றியூரில்‌ மான்‌ ஏந்திய கையனாய்‌ விளங்கும்‌ சிவபெருமானின்‌ திருவடிகளை வாழ்த்துவதே வாழ்த்து என்று சொல்லப்படும்‌.

கயிலை மலையைத்‌ தூக்கி நகர்த்த முயற்சி செய்த இலங்கை மன்னனாகிய தசக்கிரீவனின்‌ உடல்‌, தோள்‌ ஆகியன நெரியத்‌ தன்‌ கால்விரல்‌ ஒன்றால்‌ கயிலை மலை உச்சியில்‌ இலேசாக அழுத்தியவன்‌ திருநின்றியூரில்‌ எழுந்தருளிய சிவபெருமான்‌. புகலி என்று சொல்லப்பெறும்‌ சீகாழியில்‌ நன்மைகளே செய்யும்‌ மெய்யடியார்கள்‌ பலர்‌ உளர்‌. அப்பதியில்‌ தோன்றியவர்‌ ஞானசம்பந்தர்‌. இவர்‌ திருநின்றியூர்‌ இறைவனைப்‌ போற்றிப்‌ பாடிய திருவருள்‌ நலம்‌ குன்றாத இத்திருப்பதிகப்‌ பாடல்களை உரைப்பதனால்‌ குறைவின்றிப்‌ புகழ்‌ நிறையும்‌.