திருஇடும்பாவனம்

அருளியவர்: திருஞானசம்பந்தர்
பண்: நட்டபாடை
தலம்: இடும்பாவனம்
நாடு: சோழநாடு காவிரித் தென்கரை

1

மனமார்தரு மடவாரொடு மகிழ்மைந்தர்கள் மலர்தூய்த்தனமார்தரு சங்கக்கடல் வங்கத்திர ளுந்திச்சினமார்தரு திறல்வாளெயிற் றரக்கன்மிகு குன்றில்இனமாதவர் இறைவர்க்கிடம் இடும்பாவன மிதுவே.

சொற்பிரிப்பு

மனம் ஆர்தரு மடவாரொடு மகிழ் மைந்தர்கள் மலர் தூய்,தனம் ஆர்தரு, சங்கக் கடல் வங்கத்திரள் உந்தி,சினம் ஆர்தரு திறல் வாள் எயிற்று அரக்கன் மிகு, குன்றில்இன மா தவர் இறைவர்க்கு இடம் இடும்பாவனம் இதுவே.

உரை

சிவபெருமான்‌ குன்றளூர்‌ என்னும்‌ தலத்தில்‌ எழுந்தருளியுள்ளார்‌. வளம்‌ மிக்க குன்றளூர்‌ இடும்பன்‌ என்னும்‌ அரக்கனுக்குரியது. இடும்பன்‌ சினம்‌ மிக்க வலிய ஒளி பொருந்திய பற்களை உடையவன்‌. கூட்டமாகிய முனிவர்‌ குழாங்கள்‌ இங்குள்ள சிவபெருமானை வணங்குகிறார்கள்‌. சிவபெருமானுக்குரிய இடம்‌ இடும்பாவனமும்‌ ஆகும்‌. இங்குள்ள சிவபெருமானை மகழ்ச்சி மிக்க இளைஞர்கள்‌, தங்கள்‌ மனத்தால்‌ விரும்பப்‌ பெற்ற மனைவியரோடு மலர்‌ தூவி வழிபாடு செய்கிறார்கள்‌. இறைவன்‌, அவர்கள்‌ பொருட்செல்வம்‌ பெற்றுய்வதற்கு அருள்‌ புரிகின்றான்‌. இங்கு, சங்குகளை உடைய கடலில்‌ கப்பல்கள்‌ வந்து கொண்டிருக்கும்‌. அக்கப்பல்களைக்‌ கடல்‌ அலைகள்‌ உந்தி வந்து கரை சேர்க்கின்றன.

2

மலையார்தரு மடவாளொரு பாகம்மகிழ் வெய்திநிலையார்தரு நிமலன்வலி நிலவும்புக ழொளிசேர்கலையார்தரு புலவோரவர் காவல்மிகு குன்றில்இலையார்தரு பொழில்சூழ்தரும் இடும்பாவன மிதுவே.

சொற்பிரிப்பு

மலையார் தரு மடவாள் ஒரு பாகம் மகிழ்வு எய்தி,நிலை ஆர்தரு நிமலன் வலி நிலவும் புகழ் ஒளி சேர்,கலை ஆர்தரு புலவோர் அவர் காவல் மிகு, குன்றில்இலை ஆர்தரு பொழில் சூழ்வரும் இடும்பாவனம் இதுவே.

உரை

சிவபெருமான்‌, குன்றளூரை அடுத்துள்ள இலைகள்‌ அடர்ந்த சோலைகளால்‌ சூழப்பட்ட இடும்பாவனத்தில்‌ எழுந்தருளி உள்ளான்‌. இவன்‌, இமவான்‌ மகளாய்‌ மலையிடைத்‌ தோன்றி வளர்ந்த பார்வதி தேவியை ஒருபாகமாகக்‌ கொண்டு, மகிழ்ந்து நிலையாக வீற்றிருந்து அருள்புரிகின்றான்‌. இவ்வூரில்‌ குற்றமற்ற சிவபெருமானது வெற்றி விளங்குகின்றது. இங்கு கலை வல்ல புலவர்கள்‌ தங்களுடைய புகழால்‌ ஒளிமிக்கவர்களாய்‌ விளங்குகிறார்கள்‌. அவர்கள்‌, இடைவிடாது எல்லாக்‌ கலைகளையும்‌ பயின்று கொண்டிருப்பதால்‌ அவ்வூர்‌ காவல்‌ மிக்கு விளங்குகின்றது.

3

சீலம்மிகு சித்தத்தவர் சிந்தித்தெழும்1 எந்தைஞாலம்மிகு கடல்சூழ்தரும் உலகத்தவர் நலமார்கோலம்மிகு மலர்மென்முலை மடவார்மிகு குன்றில்ஏலங்கமழ் பொழில்சூழ்தரும் இடும்பாவன மிதுவே.பாடம் : 1சித்தரவர் சிந்தித்தொழும்

சொற்பிரிப்பு

சீலம் மிகு சித்தத்தவர் சிந்தித்து எழும் எந்தை,ஞாலம் மிகு கடல் சூழ் தரும் உலகத்தவர் நலம் ஆர்,கோலம் மிகு மலர் மென் முலை மடவார் மிகு, குன்றில்ஏலம் கமழ் பொழில் சூழ் தரும் இடும்பாவனம் இதுவே.

உரை

சிவபெருமான்‌ எழுந்தருளிய இடம்‌ திரு இடும்பாவனம்‌ ஆகும்‌. இங்கு, தவ ஒழுக்கத்தால்‌ மேம்பட்ட முனிவர்கள்‌ எம்‌ தந்தையாகிய சிவபெருமானைச்‌ சிந்தித்து வணங்கி வருகிறார்கள்‌. நிலப்பரப்பைக்‌ காட்டிலும்‌ அதிகப்‌ பரப்பை உடையது கடல்‌. இக்கடலால்‌ சூழப்பட்டது திருஇடும்பாவனம்‌ ஆகும்‌. இங்கு சான்றோர்கள்‌ பலர்‌ வாழ்கின்றனர்‌. நற்குணங்களும்‌, அழகும்‌, மலர்‌ போலும்‌ மென்மையான தனங்களும்‌ உடைய பெண்கள்‌ இவ்வூரில்‌ மிக்கு உள்ளார்கள்‌. இவ்வூர்‌ குன்றளூரைச்‌ சார்ந்து உள்ளது. மணம்‌ கமழும்‌ சோலைகள்‌ பல இவ்வூரைச்‌ சுற்றி உள்ளன.

4

பொழிலார்தரு குலைவாழைகள் எழிலார்திகழ் போழ்தில்தொழிலான்மிகு தொண்டரவர் தொழுதாடிய முன்றில்குழலார்தரு மலர்மென்முலை மடவார்மிகு குன்றில்எழிலார்தரும் இறைவர்க்கிடம் இடும்பாவன மிதுவே.

சொற்பிரிப்பு

பொழில் ஆர்தரு, குலை வாழைகள் எழில் ஆர் திகழ் போழ்தில்,தொழிலால் மிகு தொண்டர் அவர் தொழுது ஆடிய முன்றில்,குழல் ஆர்தரு மலர் மென் முலை மடவார் மிகு, குன்றில்எழில் ஆர்தரும் இறைவர்க்கு இடம் இடும்பாவனம் இதுவே.

உரை

சிவபெருமான்‌, அழகுக்கு அழகு செய்யும்‌ இடும்பாவனத்தில்‌ எழுந்தருளியுள்ளான்‌. அது குன்றளூரை அடுத்துள்ளது. இவ்வூரைச்‌ சுற்றிக்‌ குலைகள்‌ தள்ளிய செழிப்பான வாழைத்‌ தோட்டங்கள்‌ உள்ளன. மிகுதியான சிறப்புடைய தொண்டர்கள்‌ அழகு திகழும்‌ காலையிலும்‌, மாலையிலும்‌ இங்குப்‌ பணி செய்கின்றனர்‌, பணி செய்வதால்‌ உண்டான மகிழ்ச்சியில்‌ இந்தத்‌ தொண்டர்கள்‌ அவரவர்கள்‌ வீட்டின்முன்‌ பக்கத்தில்‌ ஆடிப்பாடி இறைவனைத்‌ தொழுகின்றார்கள்‌. இவ்வூரின்கண்‌ மலர்சூடிய கூந்தலை உடைய மென்முலை மடவார்கள்‌ நிறைந்து விளங்குகின்றார்கள்‌.

5

பந்தார்விரல் உமையாளொரு பங்காகங்கை முடிமேல்செந்தாமரை மலர்மல்கிய செழுநீர்வயற் கரைமேல்கொந்தார்மலர் புன்னைமகிழ் குரவங்கமழ் குன்றில்எந்தாயென இருந்தானிடம் இடும்பாவன மிதுவே.

சொற்பிரிப்பு

“பந்து ஆர் விரல் உமையாள் ஒரு பங்கா! கங்கை, முடிமேல்செந்தாமரை மலர் மல்கிய செழு நீர் வயல் கரைமேல்,கொந்து ஆர் மலர்ப்புன்னை, மகிழ் குரவம், கமழ் குன்றில்எந்தாய்!” என, இருந்தான் இடம் இடும்பாவனம் இதுவே.

உரை

குன்றளூரில்‌ எழுந்தருளி எந்தாய்‌ எனப்‌ போற்றப்படுகின்ற சிவபெருமான்‌ விரும்பி உறையும்‌ இடம்‌ திருஇடும்பாவனம்‌ ஆகும்‌. இவ்வூரில செந்தாமரை மலர்கள்‌ நிறைந்த நீர்‌ நிரம்பிய நிலைகள்‌ உள்ளன. இங்குள்ள வளமான வயல்களின்‌ கரைமேல்‌ கொத்துக்‌ கொத்தாக மலர்ந்த பூக்களைக்‌ கொண்ட புன்னை மரங்கள்‌ பல உள. மகிழ்‌, குரவம் மலர்‌ ஆகியனவும்‌ பூத்துக்‌ குலுங்குகின்றன. இந்த மணம்‌ இவ்வூரைச்‌ சுற்றிக்‌ கமழ்ந்து கொண்டு இருக்கின்றது. இவ்வூரில்‌ எழுந்தருளிய சிவபெருமான்‌, பந்தாடும்‌ கைவிரல்களை உடைய உமையம்மையின்‌ கணவன்‌ ஆவான்‌. அவன்தன்‌ சடைமுடியில்‌ கங்கை நதியை அணிந்துள்ளான்‌. இவனைச்‌ சென்று அடைந்து வழிபடுவீர்களாக.

6

நெறிநீர்மையர் நீள்வானவர் நினையுந்நினை வாகிஅறிநீர்மையி லெய்தும்மவர்க் கறியும்மறி வருளிக்குறிநீர்மையர் குணமார்தரு2 மணமார்தரு குன்றில்எறிநீர்வயல் புடைசூழ்தரும் இடும்பாவன மிதுவே.பாடம் : 2குளமார்தரு

சொற்பிரிப்பு

நெறி நீர்மையர், நீள் வானவர், நினையும் நினைவு ஆகி,அறி நீர்மையில் எய்தும் அவர்க்கு அறியும் அறிவு அருளி,குறி நீர்மையர் குணம் ஆர்தரு மணம் ஆர்தரு குன்றில்,எறி நீர் வயல் புடை சூழ்தரும் இடும்பாவனம் இதுவே.

உரை

சிவபெருமான்‌ விரும்பி விளங்கும்‌ இடம்‌ இடும்பாவனம்‌ ஆகும்‌. இது குன்றளூரை அடுத்து உள்ளது. இவ்வூரில்‌ தூய சிந்தனையைத்‌ தூண்டும்‌ மணத்தை வீசுகின்ற மலர்கள்‌ பூத்துக்‌ குலுங்குகின்றன. இடும்பாவனத்தில்‌ உள்ள இறைவர்‌, தவ ஒழுக்கத்தால்‌ சிறந்த முனிவர்கள்‌, உயர்ந்த தேவர்கள்‌ ஆகியோர்‌ நினையும்‌ நினைவுப்‌ பொருளாகி விளங்குகின்றான்‌. ஞானத்தால்‌ தொழும்‌ மேலான ஞானியர்கட்குத்‌ தன்னை அறியும்‌ அறிவை நல்குகின்றான்‌. இவன்‌ சிவலிங்கம்‌ முதலான குறிகளில்‌ இருந்து அருள்புரிகின்றான்‌.

7

நீறேறிய திருமேனியர் நிலவும்முல கெல்லாம்பாறேறிய படுவெண்டலை கையிற்பலி வாங்காக்3கூறேறிய மடவாளொரு பாகம்மகிழ் வெய்திஏறேறிய இறைவர்க்கிடம் இடும்பாவன மிதுவே.பாடம் : 3பாங்காய்க்

சொற்பிரிப்பு

நீறு ஏறிய திருமேனியர், நிலவும் உலகு எல்லாம்பாறு ஏறிய படு வெண் தலை கையில் பலி வாங்கா,கூறு ஏறிய மடவாள் ஒரு பாகம் மகிழ்வு எய்தி,ஏறு ஏறிய இறைவர்க்கு இடம் இடும்பாவனம் இதுவே.

உரை

சிவபெருமானுக்குரிய இடம்‌ இடும்பாவனம்‌ ஆகும்‌. இவன்‌ திருமேனியில்‌ நீறு அணிந்துள்ளான்‌. விளங்கும்‌ உலகெங்கணும்‌ சென்று அன்பர்கள்‌ இடும்‌ உணவைப்‌ பிரம கபாலத்தில்‌ பெறுகின்றான்‌. அந்தப்‌ பிரம கபாலம்‌ பருந்து உண்ணவரும்‌ தசையோடு கூடிய காய்ந்த மண்டை ஓடு ஆகும்‌. உமையம்மையைத்‌ தன்‌ திருமேனியின்‌ ஒரு கூறாகிய இடப்பாகத்தில்‌ ஏற்றுக்‌ கொண்டுள்ளான்‌. அவன்‌ விடைமீது ஏறி மகிழ்ந்து அடியார்களுக்கு அருள்‌ செய்ய வருகின்றான்‌. இவனை அடைந்து வணங்குவீர்களாக.

8

தேரார்தரு திகழ்வாளெயிற் றரக்கன்சிவன் மலையைஓராதெடுத் தார்த்தான்முடி யொருபஃதவை நெரித்துக்கூரார்தரு கொலைவாளொடு குணநாமமுங் கொடுத்தஏரார்தரும் இறைவர்க்கிடம் இடும்பாவன மிதுவே.

சொற்பிரிப்பு

தேர் ஆர்தரு திகழ் வாள் எயிற்று அரக்கன், சிவன் மலையைஓராது எடுத்து ஆர்த்தான், முடி ஒருபஃது அவை நெரித்து,கூர் ஆர்தரு கொலைவாளொடு குணம் நாமமும் கொடுத்த,ஏர் ஆர்தரும், இறைவர்க்கு இடம் இடும்பாவனம் இதுவே.

உரை

வானவெளியில்‌ தேர்மிசை ஏறிவந்த ஒளிபொருந்திய பற்களையும்‌ உடைய அரக்கனாகிய இராவணன்‌, சிவபிரான்‌ எழுந்தருளிய கயிலை மலையின்‌ சிறப்பை ஓராது, தன்‌ தேர்‌ தடைப்படுகிறது என்ற காரணத்திற்காக மலையைப்‌ .பெயர்த்துச்‌ செருக்கால்‌ ஆரவாரம்‌ செய்ய, அவன்‌ பத்துத்‌ தலைமுடிகளையும்‌ நெரித்த பின்‌ அவன்‌ வருந்தி வேண்ட, கருணையோடு கூரிய தெய்வீக வாள்‌, குணத்தைப்‌ புலப்படுத்தும்‌ இராவணன்‌ என்ற பெயர்‌ ஆகியவற்றைக்‌ கொடுத்தருளிய அழகனாகிய இறைவற்கு இடம்‌ இடும்பாவனம்‌ ஆகும்‌.

9

பொருளார்தரு மறையோர்புகழ் விருத்தர்பொலி மலிசீர்த்தெருளார்தரு சிந்தையொடு சந்தம்மலர் பலதூய்மருளார்தரு மாயன்னயன் காணார்மய லெய்தஇருளார்தரு கண்டர்க்கிடம் இடும்பாவன மிதுவே.

சொற்பிரிப்பு

பொருள் ஆர்தரும் மறையோர் புகழ் விருத்தர் பொலி மலி சீர்த்தெருள் ஆர்தரு சிந்தையொடு சந்தம் மலர் பல தூய்,மருள் ஆர்தரு மாயன் அயன் காணார் மயல் எய்த,இருள் ஆர்தரு கண்டர்க்கு இடம் இடும்பாவனம் இதுவே.

உரை

தருக்கு மிகுந்த மாயனும்‌ அயனும்‌ காணாது மயங்கப்‌ பொருள்‌ நிறைந்த வேதங்களைக்‌ கற்றுணர்ந்த அந்தணர்களால்‌ புகழ்ந்து போற்றப்‌ பெறும்‌ பழமையானவரும்‌, புகழ்மிக்க அம்மறையோர்களால்‌ தெளிந்த சிந்தையோடு பல்வகை நிறங்களுடன்‌ கூடிய மலர்களைத்‌ தூவி வழிபடப்‌ பெறுபவரும்‌ ஆகிய அருள்‌ நிறைந்த கண்டத்தை உடைய சிவபிரானுக்குரிய இடமாக விளங்கும்‌ இடும்பாவனம்‌ இதுவேயாகும்‌.

10

தடுக்கையுடன் இடுக்கித்தலை பறித்துச்சமண் நடப்பர்உடுக்கைபல துவர்க்கூறைகள் உடம்பிட்டுழல் வாரும்மடுக்கண்மலர் வயல்சேர்செந்நெல் மலிநீர்மலர்க் கரைமேல்இடுக்கண்பல களைவானிடம் இடும்பாவன மிதுவே.

சொற்பிரிப்பு

தடுக்கை உடன் இடுக்கித் தலை பறித்துச் சமண் நடப்பார்,உடுக்கைபல துவர்க்கூறைகள் உடம்பு இட்டு உழல்வாரும்,மடுக்கள் மலர் வயல் சேர் செந்நெல் மலி நீர் மலர்க் கரைமேல்இடுக் கண் பல களைவான் இடம் இடும்பாவனம் இதுவே.

உரை

பனை ஓலையால்‌ செய்த தடுக்கைத்‌ தம்‌ கையில்‌ இடுக்கிக்‌ கொண்டு தலையில்‌ உள்ள உரோமங்களைப்‌ பறித்து முண்டிதமாக நடக்கும்‌ சமணரும்‌, உடுப்பதற்குரிய காவியுடைகளை அணிந்து திரியும்‌ புத்தரும்‌ அறிய இயலாதவனாய்‌, துன்பம்‌ நீக்கி இன்பம்‌ அருளும்‌ இறைவனது இடம்‌, தாமரை செங்கழுநீர்‌ போன்ற மலர்களை உடைய மடுக்களும்‌, செந்நெல்‌ வயல்களும்‌ சூழ்ந்த, நீர்மலர்‌ மிக்க நீர்நிலைகளின்‌ கரைமேல்‌ விளங்கும்‌ இடும்பாவனம்‌ இதுவேயாகும்‌.

11

கொடியார்நெடு மாடக்குன்ற ளூரிற்கரைக் கோலஇடியார்கட லடிவீழ்தரும் இடும்பாவனத் திறையைஅடியாயுமந் தணர்காழியுள் அணிஞானசம் பந்தன்படியாற்சொன்ன4 பாடல்சொலப் பறையும்வினை தானே.பாடம் : 4படியார்சொன்ன

சொற்பிரிப்பு

கொடி ஆர் நெடுமாடக் குன்ற ளூரின் கரைக் கோலஇடி ஆர் கடல் அடி வீழ்தரும் இடும்பாவனத்து இறையை,அடி ஆயும் அந்தணர் காழியுள் அணி ஞானசம்பந்தன்படியால் சொன்ன பாடல் சொல, பறையும், வினைதானே.

உரை

கொடிகள்‌ கட்டிய நீண்ட மாடங்களோடு கூடிய குன்றளூரின்‌ கரைமீது இடித்து மோதுகின்ற அலைகளையுடைய அழகிய கடல்‌ தன்‌ அலைகளால்‌ அடிவீழ்ந்து இறைஞ்சும்‌ இடும்பாவனத்து இறைவனை, திருவடிகளையே சிந்தித்து ஆய்வு செய்யும்‌ அந்தணர்கள்‌ வாழும்‌ காழிப்பதிக்கு அணியாய ஞானசம்பந்தன்‌ முறையோடு அருளிய இப்பாடல்களை ஓத, வினைகள்‌ நீங்கும்‌.