திருப்புள்ளமங்கை

திருப்புள்ள மங்கை என்ற ஊரில்‌ உள்ள ஆலந்துறை என்னும்‌ கோவிலில்‌ சிவபெருமான்‌ எழுந்தருளியுள்ளார்‌. அவர்‌, பாலைக்‌ காய்ச்ச, தயிராக்கி, அத்தயிரைக்‌ கடைதலால்‌ விளைந்து வரும்‌ வெண்ணைத்‌ திரள்‌ போன்றவர்‌. காலனது வலிமை முழுவதையும்‌ அழித்தவர்‌. வேதப்புலமையில்‌ நான்முகனைப்‌ போன்ற அந்தணர்கள்‌ வாழ்கின்ற ஊர்‌ திருப்புள்ள மங்கை. இவ்வூரைச்‌ சுற்றி சோலைகள்‌ சூழ்ந்துள்ளன. இவ்வூர்க்‌ கோயிலில்‌ எழுந்தருளியுள்ள சிவபெருமானை நினைந்து வழிபடுபவர்களைத்‌ தீய வினைகள்‌ அடையா.

சிவபெருமான்‌ இமவான்‌ மகளாகிய பார்வதி தேவியின்‌ கணவன்‌ ஆவான்‌. அவன்‌ புள்ள மங்கை என்னும்‌ ஊரில்‌ உள்ள ஆலந்துறை என்னும்‌ கோயிலில்‌ எழுந்தருளி உள்ளான்‌. இவ்வூர்‌, அலைகளோடு கூட, நீர்‌ பெருகி வரும்‌ காவிரிக்‌ கரையில்‌ உள்ளது. இவ்வூரைச்‌ சுற்றிச்‌ சோலைகள்‌ நிறைந்துள்ளன. இவ்வூரில்‌ கலைகள்‌ பலவற்றை அறிந்த, அறிவால்‌ நிறைந்த மறையவர்கள்‌ வாழ்கிறார்கள்‌. அவர்கள்‌ இவ்வூர்‌ இறைவனை மனத்தால்‌ கருதி, காயத்தால்‌ தொழுது, வாயால்‌ ஏத்தி வழிபடுகிறார்கள்‌. இப்பூவுலகம்‌ நீர்‌ நிறைந்த கடலால்‌ சூழப்பட்டது. இந்த உலகத்தில்‌ உயிர்கள்‌ பிறவி எடுத்து, இறந்தும்‌, பிறந்தும்‌ மீண்டும்‌ மீண்டும்‌ இப்பிறவிச்‌ சூழூலில்‌ உழல்கின்றன. இவ்வாறு உழல்வதைக்‌ களைந்து பிறவா வரம்‌ அளிக்கக்‌ கூடியவன்‌ சிவபெருமான்‌ ஒருவனே. இவ்வூரில்‌ இருக்கின்ற சிவனை வழிபாடு செய்து பிறவிப்‌ பெருங்கடலை நீந்திக்‌ கரை சேருங்கள்‌.

சிவபெருமான்‌ விடக்கறை பொருந்திய கண்டத்தை உடையவன்‌. மணம்‌ கமழும்‌ கொன்றை மலர்‌ அணிந்த சடைமுடியினை உடையவன்‌. அச்சடையின்மீது சுமையாக அமைந்த கங்கை ஆற்றை அணிந்தவன்‌. இவன்‌ புள்ள மங்கையில்‌ உள்ள ஆலந்துறை என்னும்‌ கோயிலில்‌ எழுந்தருளி உள்ளான்‌. இவ்வூர்‌ சோலைகளால்‌ சூழப்பட்டது. அங்கு சிறகுகளுடன்‌ கூடிய தேனை உண்ட வண்டுகள்‌ ரீங்காரம்‌ செய்து கொண்டிருக்கின்றன. அக்கோயிலுக்குச்‌ சென்று அப்பெருமானது திருவடிகளைத்‌ துதி செய்து தொழுவீராக.

சிவபெருமான்‌ தன்‌ முடியின்மீது குளிர்ந்த பிறைச்‌ சந்திரனைச்‌ சூடி உள்ளான்‌. பாம்பையும்‌ தன்‌ முடிமிசை வைத்துள்ளான்‌. இவன்‌ காவிரி நதியின்‌ தென்கரையில்‌ உள்ள புள்ளமங்கையில்‌ உள்ள ஆலந்துறை என்னும்‌ கோயிலில்‌ எழுந்தருளியுள்ளான்‌. இவ்வூரில்‌ உள்ள காவிரி நதியானது, பொன்னையும்‌, வைரக்‌ குவியல்களையும்‌ அழகிய மணியோடு கொண்டு வந்து கரையில்‌ சேர்க்கின்றன. இவ்வூரில்‌ உள்ள அடியவர்கள்‌ எமது தொண்டுகளுக்கு உரியவன்‌ இவனே என்று அங்குள்ள சிவனைத்‌ தொழுது ஏத்த வணங்குகிறார்கள்‌.

உயிர்‌ உடலை அடுத்தற்குக்‌ காரணமான வினைகள்‌ நீங்கும்‌ வகையில்‌ பெருமானை நீவீர்‌ வணங்குவீர்களாக. செழுமையான மலர்க்‌ கொத்துக்களை உடைய சந்தனம்‌, அகில்‌ முதலியவற்றைக்‌ கொண்டு வரும்‌ காவிரியாற்றின்‌ கரைமேல்‌ உள்ளதும்‌ பொந்துகளில்‌ ஆந்தைகள்‌ பல தங்கிப்‌ பாடுவதும்‌ ஆகிய புள்ளமங்கையில்‌ அமைந்த ஆலந்துறை என்னும்‌ கோயிலை இடமாகக்‌ கொண்டுள்ள தலைவனாகிய சிவபெருமான்‌ நம்மை ஆள்வான்‌.

சிவபெருமான்‌ விரும்பி உறையும்‌ இடம்‌ புள்ளமங்கையில்‌ உள்ள ஆலந்துறை இவன்‌ உலகிற்குத்‌, தான்‌ ஒருவனே மன்னனாய்‌ விளங்குபவன்‌. மழையாய்ப்‌ பயிர்களை விளைவிப்பவனும்‌ அவனே. குற்றமற்ற நால்வகைப்‌ பொன்னில்‌ சிறந்த சாம்பூநதம்‌ ஆகியவனும்‌ அவனே. அவனே எனக்குத்‌ தலைவன்‌. அவன்‌ இசைவடிவாய்‌ விளங்குபவன்‌. அவன்‌ இள ஞாயிற்றின்‌ ஒளியைப்‌ போன்ற ஒளியை உடையவன்‌. புள்ள மங்கை சென்று ஆலந்துறையில்‌ வீற்றிருக்கின்ற சிவனை வணங்குவீர்களாகுக. .

சிவபெருமான்‌ விரும்பி உறையும்‌ இடம்‌ சோலைகளால்‌ சூழப்பெற்ற புள்ள மங்கையில்‌ உள்ள ஆலந்துறை என்னும்‌ கோயில்‌ ஆகும்‌. இவன்‌ தன்‌ தலைமேல்‌ விளங்கும்‌ சடையின்‌ மீது முளை போன்ற இளம்‌ பிறையைச்‌ சூடி உள்ளான்‌. தன்‌ இருமேனியில்‌ வெள்ளிய திருநீறு அணிந்துள்ளான்‌. மணம்‌ கமழும்‌ மலர்களையும்‌ புனிதமான நீரையும்‌ கொண்டு தன்‌ திருவடிகளை வணங்கி ஏத்தும்‌ அடியார்களுக்கு இனியனாய்‌ விளங்குகின்றான்‌. அவன்‌ இருக்கும்‌ இடம்‌ சென்று அவனை வழிபாடு செய்வீராக.

சிவபெருமான்‌ விரும்பி உறையும்‌ இடம்‌ புள்ள மங்கையில்‌ உள்ள ஆலந்துறை என்னும்‌ கோயிலாகும்‌. இவன்‌ மாலைகள்‌ அணிந்துள்ளான்‌. சடை முடியை உடையவன்‌. இவ்வூரில்‌ புலன்களை வென்ற புகழுடைய அந்தணர்கள்‌, வாழ்கின்றனர்‌. வேதங்களை முறையாகக்‌ கற்றறிந்த மறையவர்கள்‌ அவனை ஓதித்‌ துதிக்கின்றார்கள்‌. இலங்கை மன்னனாகிய தசக்கிரீவன்‌ தலைகளும்‌ தோள்களும்‌ நெறிய சிவபெருமான்‌ தன்‌ எழுச்சி பொருந்திய அழகிய கால்‌ விரலால்‌ மலையின்‌ உச்சியில்‌ ஊன்ற, அவனைக்‌ கயிலை மலையிடை அகப்படுத்தி அடர்த்தான்‌. இவன்‌ ஊரை அடைந்து இவனை ஏத்தித்‌ தொழுவீர்களாக.

சிவபெருமானுக்கு உரிய இடம்‌ புள்ள மங்கையில்‌ உள்ள ஆலந்துறையாகும்‌. இவன்‌ வெண்மையான திருநீற்றை மூன்று பட்டைகளாய்ச்‌ செறியப்‌ பூசியவன்‌. உத்தம இலக்கணம்‌ ஆகிய மூன்று வரி பொருந்திய முப்புரி நூல்‌ அணிந்த மலை போன்ற திண்ணிய மார்பினை உடையவன்‌. மணங்கமழும்‌ தாமரை மலர்மேல்‌ உறைகின்ற நான்முகனும்‌, திருமாலும்‌ தன்னைத்‌ தேடி அறியாவகை ஓங்கி அழலாய்‌ நின்றவன்‌. அவன்‌ இருக்கும்‌ இடம்‌ சென்று அவனை வணங்குவீர்களாக.

நீதி அறியாத அமணராகிய கீழ்‌ மக்களும்‌ பிச்சைப்‌ பாத்திரத்தைக்‌ கையில்‌ ஏந்திப்‌ போதி மரத்தடியில்‌ உறையும்‌ புத்த மதத்தினரும்‌ கூறும்‌ உரைகளை மெய்ம்மை எனக்‌ கொள்ளாது எல்லாப்‌ பொருள்கட்கும்‌ ஆதியானவனாகிய புள்ளமங்கையில்‌ உள்ள ஆலந்துறைக்‌ கோயிலில்‌ உறையும்‌ 'இறைவனைத்‌ தொழுமின்‌; பல்வேறு பிரிவினராகிய தேவர்கள்‌ தொழும்‌ தன்மை பெறலாம்‌.

மரப்‌ பொந்துகளில்‌ தேனீக்கள்‌ சேகரித்த தேன்‌ மிகுதியான அளவில்‌ கடைக்கும்‌ பொழில்கள்‌ சூழ்ந்ததும்‌, அழகிய தண்மையான நீரைக்‌ கொணர்ந்து தரும்‌ காவிரிக்கரையில்‌ உள்ளதும்‌ ஆகிய புள்ளமங்கையில்‌ உள்ள ஆலந்துறை இறைவனை, மணம்‌ நிறைந்து கமழும்‌ காழிப்‌ பதியில்‌ தோன்றிய கலை நலம்‌ உடைய ஞானசம்பந்தன்‌ பாடிய சந்தம்‌ நிறைந்த இத்திருப்பதிகப்‌ பாடல்களை ஓதிப்‌ பரவசமாய்‌ ஆடத்‌, தவம்‌ கைகூடும்‌.