திருவியலூர்

குரா மலரின்‌ மணம்‌ கமழ்வதும்‌, இயற்கையிலேயே மணம்‌ உடையதுமான மென்மையான கூந்தலை உடைய உமையம்மை, அஞ்சும்படியாகச்‌ சிவபெருமான்‌ தன்னோடு பொருதற்கு வந்த யானையைக்‌ கொன்று அதன்‌ தோலை உரித்துத்‌ தன்‌ திருமேனியில்‌ போர்த்துக்‌ கொண்டான்‌. அலன்‌ சடையில்‌ பாம்பு, கங்கை, சந்திரன்‌, வெண்தலை ஓடு ஆகியவற்றை அணிந்துள்ளான்‌. அவனுக்கு உரிய இடம்‌ நீர்வளம்‌ மிக்க வியலூர்‌ ஆகும்‌.

சிவபெருமான்‌ எருதின்மேல்‌ ஊர்ந்து வருகின்றான்‌. பல்வேறு மூர்த்தங்களைக்‌ கொண்டவன்‌. அவன்‌ என்றும்‌ நிலையானவன்‌. கங்கை ஆற்றை சடையில்‌ நிறுத்தியவன்‌. அனல்‌ போன்ற சிவந்த மேனியன்‌. பேரன்புடையவன்‌. பகைவராக வந்த அசுரர்களின்‌ முப்புரங்கள்‌ எரியுமாறு வில்லை வளைத்தவன்‌. உமையம்மை பெருமிதம்‌ கொள்ள பலவகைச்‌ சிறப்புக்களோடு நிற்பவன்‌. இவனுக்கு உரிய இடம்‌ நீர்வளம்‌ மிக்க வியலூர்‌ ஆகும்‌.

செம்மையும்‌ மென்மையும்‌ உடைய சடை தாழ்ந்து தொங்கும்படியாகத்‌ தாருகாவனத்து முனிவர்‌ மனைவியர்‌ வாழும்‌ இல்லங்கள்‌ தோறும்‌ சிவபெருமான்‌ சென்று உணவு இடுங்கள்‌ என்று இசை பாடினான்‌. அவன்‌ உறைகின்ற இடம்‌ திருவியலூர்‌. இங்கு “உம்‌‘ என்ற ஒலிக்குறிப்போடு அருவிகள்‌ குடகு மலை உச்சியிலிருந்து காவிரியாய்‌ வர அந்நீர்‌ வளத்தால்‌ புகழோடு செழித்து வளரும்‌ சோலைகளையும்‌ பொருந்திய வயல்களையும்‌ உடைய நீர்வளம்‌ மிக்கது வியலூர்‌ ஆகும்‌.

அடியவர்கள்‌ தத்தம்‌ அடைவின்படி சிவபெருமானைத்‌ தொழுது வணங்குகிறார்கள்‌. அவன்‌ பிரம்ம கபாலத்தில்‌ மகளிர்‌ இட்ட உணவை உண்பவன்‌. அவன்‌ விரும்பி உறையும்‌ இடம்‌ திருவியலூர்‌. இங்கு உழவர்கள்‌ வயல்களில்‌ நீரைப்‌ பாய்ச்சுகின்றார்கள்‌. அங்கு மூங்கில்கள்‌ முத்துக்களை வரிசையாகச்‌ சொரிகின்றன. ஆற்றில்‌ அகில்‌ மரங்கள்‌ மிதந்து வருகின்றன. சோலைகளில்‌ மரங்கள்‌ அடர்த்தியாக வளர்ந்துள்ளன. இத்தகைய நீர்வளம்‌ மிக்கது வியலூர்‌ ஆகும்‌.

சிவபெருமான்‌ தியானத்தின்‌ பயனாய்‌ இருப்பவன்‌. நான்முகனாய்‌ உலகைப்‌ படைப்போனும்‌ அவனே. எண்ணற்ற கலைகளாய்த்‌ திகழ்வோனும்‌ சந்த இசையோடு கூடிய வேதங்களாய்‌ விளங்குபவனும்‌ அவனே. உலகில்‌ மிக உயர்ந்த பொருளாய்‌ இருப்போனும்‌ அவனே. அவன்‌ எல்லோர்க்கும்‌ தலைவன்‌ ஆவான்‌. அவன்‌ கண்‌ நிறைந்த பேரழகு உடையோன்‌ ஆவான்‌. விண்ணவர்களாகிய தேவர்களும்‌ மண்ணவர்களாகிய மக்களும்‌ வந்து வணங்கும்‌ நீர்வளம்‌ மிக்க வியலூர்‌ அவனது இடமாகும்‌.

சிவபெருமான்‌ வேட்டுவ வடிவம்‌ கொண்டு வளைந்த வில்லை ஏந்தித்‌ தன்னை நோக்கித்‌ தவம்‌ இயற்றும்‌ அர்ச்சுனனின்‌ ஆற்றலை அறிதற்பொருட்டு அவனிடம்‌ போராடினான்‌. எல்லா திசைகளிலும்‌ உள்ளோரும்‌ காண ஒற்றைக்‌ காலில்‌ நின்று தவம்‌ செய்து கொண்டிருந்தான்‌ அர்ச்சுனன்‌. அவனோடு போர்‌ செய்து அவனைத்‌ - தோற்கடித்தான்‌. பின்னர்‌ அவனுடைய ஆற்றலைப்‌ பாராட்டி அவன்‌ அழியாதவாறு அவனுக்குப்‌ பாசுபதம்‌ போன்ற படைக்கலங்களை அருளினான்‌ நம்‌ சிவபெருமான்‌. அவனது இடம்‌ நீர்வளம்‌ மிக்க வியலூர்‌ ஆகும்‌.

சிவபெருமான்‌ தலைமையான அரவை அணிந்தவன்‌. தலையோட்டில்‌ இரத்தல்‌ தொழில்‌ புரிகின்றவன்‌. பகலில்‌ நட்டம்‌ ஆடுபவன்‌. ஊனிடை உயிராக விளங்குபவன்‌. பசுபோத முனைப்பால்‌ உயர்வாக எண்ணுகின்ற உயிர்களிடத்துப்‌ பொருந்தாதவன்‌. அனைத்து விளைபொருள்களாய்‌ நிற்கும்‌ தலைவன்‌. இவ்வாறு நினைத்தற்கு உரியவனாகிய சிவபெருமானது இடம்‌ புண்ணியப்‌ பயனால்‌ மேன்மை நாடிய விண்ணவர்களால்‌ தொழப்‌ பெரும்‌ நீர்வளம்‌ சார்ந்த வியலூர்‌ ஆகும்‌.

எனக்கு எதிராகப்‌ போர்‌ புரிபவர்‌ யார்‌? என்ற செருக்கால்‌ கயிலை மலையை நகர்த்த முயன்றவன்‌ இராவணன்‌. அவன்‌ வலிய பெரிய மலைபோலும்‌ கைகள்‌, தோள்கள்‌ மற்றும்‌ மார்புகளை உடையவன்‌. ஒளி பொருந்திய நீண்ட மகுடங்களுடன்‌ கூடிய தலைகளும்‌ உடையவன்‌. அத்தலைகள்‌ நெரிதலால்‌ அவன்‌ கதறுமாறு, செறிந்த கழல்களுடன்‌ கூடிய திருவடியின்‌ விரலால்‌ சிவபெருமான்‌ மலையை அழுத்தினான்‌. இவனது இடம்‌ நீர்வளம்‌ மிக்க வியலூர்‌ ஆகும்‌.

வளமையோடு அலர்ந்த தாமரை மலர்மேல்‌ உறையும்‌ நான்முகனும்‌ திருமாலும்‌ தமக்குள்‌ யார்‌ பெரியவர்‌ என்று செறுக்குற்று அலைந்தனர்‌. அப்பொழுது அவர்களின்‌ முன்‌ சோதிப்பிழம்பு ஒன்று தோன்றி நின்றது. அப்பொழுது அசரீரி ஒன்று இதன்‌ அடியினையும்‌ முடியினையும்‌ காணுங்கள்‌ என்று கூறியது. அதன்படி இவர்கள்‌ அச்சோதிப்பிழம்பின்‌ அடியினையும்‌ முடியினையும்‌ காண முனைந்தனர்‌. நான்முகனும்‌ திருமாலும்‌ அன்னமும்‌ பன்றியுமாய்‌ வருந்தி முயன்றும்‌ அறியவொண்ணாதவாறு அழல்‌ உருவாய்‌ நின்றிருந்தான்‌ சிவபெருமான்‌. அவ்விருவரும்‌ தம்‌ செருக்கு அடங்கி வேண்டத்‌ தழல்‌ வடிவான தூணின்‌ நடுவே ஓர்‌ உருவமாக வெளிப்பட்டு சிவபெருமான்‌ அருள்‌ செய்தான்‌. இவனது இடம்‌ நீர்வளம்‌ மிக்க வியலூர்‌ ஆகும்‌.

ஓலைப்‌ பாயால்‌ உடலை மறைப்பவராகிய சமண முனிவர்களுடனும்‌, பொன்னிற ஆடையால்‌ உடலை மூடிப்‌ பிடகம்‌ என்னும்‌ நூலைத்‌ தம்‌ மத வேதமாக உரைக்கும்‌ புத்த மதத்‌ தலைவர்களுடனும்‌ நம்‌ பெரியோர்‌ நட்புக்‌ கொள்ளார்‌. கடலில்‌ தோன்றிய நஞ்சைத்‌ தான்‌ உண்டு, அமுதை அமரர்க்களித்தருளிய விடைக்கொடியை உடைய சிவபிரானது இடம்‌ நீர்வளம்‌ மிக்க வியலூராகும்‌. அதனைச்‌ சென்று வழிபடுமின்‌.

விளங்கும்‌ பிறையைச்‌ சடைமேல்‌ உடைய விகிர்தனாய சிவபிரானது வியலூரை, இடமகன்ற ஊராகிய புகலியில்‌ தோன்றிய தக்க தமிழ்‌ ஞானசம்பந்தன்‌ போற்றிப்‌ பாடிய துளக்கமில்லாத இத்தமிழ்‌ மாலையைப்‌ பாடிப்‌ பரவித்‌ தொழும்‌ அடியவர்‌, எக்காலத்தும்‌ விளங்கும்‌ புகழோடு உயரிய விண்ணுலகையும்‌ தமதாக உடையவர்‌ ஆவர்‌.