திருவீழிமிழலை

சிவபெருமான்‌ தன்‌ சடைமுடியில்‌ கங்கையைத்‌ தரித்தவன்‌. இடையினின்று சரிந்து தழுவும்‌ ஒப்பற்ற கோவண ஆடையை அணிந்தவன்‌. மழுப்படையை உடையவன்‌. பலவகையான பூதங்களைப்‌ படையாகக்‌ கொண்டவன்‌. மடமைத்‌ தன்மை பொருந்திய மான்விழி போன்ற விழிகளை உடைய உமையம்மையாகிய பெண்ணை இடப்பாகத்தில்‌ கொண்டவன்‌. அவன்‌ என்னை ஆளாக உடையவன்‌. அவன்‌ விடைக்கொடி உடையவன்‌. அவன்‌ எழுந்தருளிய இடம்‌ திருவீழிமிழலை.

ஊழிக்காலத்தில்‌ அனைத்தையும்‌ ஒடுக்கி, அங்ஙனம்‌ ஒடுக்கப்பட்ட உலகைத்‌ தான்‌ ஒருவனே முதற்பொருளாய்‌ நின்று மீளத்‌ தோற்றுவிப்பவன்‌ சிவபெருமான்‌. அவன்‌ சக்தி, சிவம்‌ என இருவகைப்பட்டவன்‌. முக்குணங்களின்‌ வழிநின்று முத்தொழில்‌ செய்யும்‌ கடவுளாய்‌, எக்காலத்தும்‌ மாறுபடாத நான்மறை வடிவினன்‌. ஐம்பெரும்‌ பூதங்கள்‌, ஆறுசுவை, ஏழு ஓசை, எட்டுத்‌ திசை ஆகியவற்றில்‌ நிறைந்தவனாய்‌ உள்ளான்‌. அவன்‌ குணம்‌ மூன்றாய்‌ ஒவ்வொன்றோடும்‌ அவ்வப்பொருளேயாகியும்‌ அவற்றின்‌ வேறாகியும்‌, உடனாகியும்‌ விளங்குகின்றான்‌. அவனது இடம்‌ திருவீழிமிழலை.

அன்று அலர்ந்த மலர்களைச்‌ சார்த்தி வணங்கி உய்தி பெற அடியவர்களே வாருங்கள்‌. உயர்ந்த உம்முடைய அன்போடு எனது அன்பையும்‌ அவன்‌ ஏற்றருளுகின்றான்‌. அவன்‌ கோயிலில்‌ ‘மும்’ என்ற ஒலிக்‌ குறிப்போடு வண்டுகள்‌ கிளறுவதால்‌ திசையெங்கும்‌ பூமணம்‌ கமழும்‌ சோலைகளும்‌ தண்ணிய வயல்களும்‌ சூழ்ந்துள்ளது திருவீழிமிழலையாகும்‌.

இசையும்‌, அதற்கு அடிப்படையான ஏழு சுரங்களும்‌, வல்லோசை, மெல்லோசை முதலியவற்றையுடைய தமிழும்‌ உள்ளத்து உணர்வாகிய சுவையும்‌ பொருந்திய தாள வேறுபாட்டு ஒலிகளும்‌ மண்‌, புனல்‌, உயிர்‌, காற்று, நெருப்பு, சூரியன்‌, சந்திரன்‌, விண்‌ ஆகிய எண்வகை வடிவங்களும்‌ ஆகியவற்றில்‌ முழுதும்‌ அவையேயாகக்‌ கலந்திருப்பவன்‌ சிவபெருமான்‌. அவனது இடம்‌ திருவீழிமிழலை.

சிவபெருமான்‌, சுருதி, யுக்தி, அனுபவங்களால்‌ ஆராய்ச்சி செய்யாத பல சமயங்களால்‌ அறியப்பெறாதவன்‌. அறநெறிகளின்‌ தாயாய்‌ விளங்குவோன்‌. எல்லா உயிருக்கும்‌ அனாதியாகவே தலைவன்‌. வேத வேள்விகளில்‌ முத்தீ வடிவினன்‌. சிவன்‌ என்னும்‌ திருப்பெயருடையவன்‌. எங்கட்குத்‌ தலைவன்‌. செல்வம்‌ நிறைந்த திருவாரூரில்‌ எழுந்தருளியிருப்பவன்‌. அத்தகையோன்‌ உறையுமிடம்‌ திருவீழிமிழலை.

சிவபிரான்‌ கல்லால மரநிழலின்‌ கீழ்யோகியாய்‌ வீற்றிருந்தான்‌. அக்காலத்தில்‌ திரிபுரத்து அசுரர்களால்‌ துன்பமடைந்த வானோர்‌, “காவாய்‌” என வேண்டினார்கள்‌. சூரிய சந்திரராகிய சக்கரம்‌ பூட்டிய பூமியைத்‌ தேராகக்‌ கொண்டான்‌. வேதங்களாகிய தேரிற்‌ பூட்டிய குதிரைகளை நான்முகன்‌ செலுத்தினான்‌. அக்னி தேவனை வலிய வாயாகவும்‌, வாயு தேவனை இறகாகவும்‌ கொண்ட திருமாலாகிய அம்பை கையில்‌ ஏந்தினான்‌. வாசுகி என்னும்‌ பாம்பினை நாணாகப்‌ பூட்டி மேரு மலையாகிய வில்லால்‌ அம்பைச்‌ செலுத்தித்‌ திரிபுரங்களை அழித்தான்‌. அவனது இடம்‌ திருவீழிமிழலை.

பிரம கபாலம்‌ பொருந்திய திருக்கரத்தினன்‌. யானையை உரித்ததால்‌ கடைத்ததொரு மேற்போர்வையினன்‌. முப்புர அசுரர்‌ அழியத்‌ தன்னடி பணிந்த அம்முப்புரத்தலைவர்‌ மூவர்கட்கும்‌ மிக்க வரங்களை அளித்தவன்‌. அப்பெருமானது இடம்‌, வளர்ந்தோங்கிய புன்னை மரங்கள்‌ முத்துக்கள்‌ போல்‌ அரும்பி மலர்ந்து பொன்‌ தாதுக்களை ஈன்று பச்சை மணிகளைப்‌ போல்‌ காய்த்து அழகு செய்கின்ற திருவீழிமிழலை ஆகும்‌.

தன்னை எதிர்த்து நிற்பார்‌ யாரும்‌ இல்லாத அரக்கனாகிய இராவணன்‌ வடதிசையில்‌ உள்ள கைலாய மலையைத்‌ தூக்கி நகர்த்தி வைக்க முற்பட்டான்‌. அவன்‌ தலைகள்‌ தோள்கள்‌ ஆகியன நசுக்கப்பட்டு அதனால்‌ துன்பம்‌ அடைந்தான்‌. பின்னர்‌ அவன்‌ சிவபெருமானைப்‌ பணிந்து, சாம கீதம்‌ பாட சிவபெருமான்‌ அவன்மீது அருள்‌ செய்தான்‌. அவனுக்குப்‌ பெரிதாகிய வாள்‌, இராவணன்‌ என்ற பெயர்‌ ஆகியனவற்றைக்‌ கொடுத்தருளினான்‌. மின்னல்‌ போல்‌ பொலிவும்‌, சடைமுடியையும்‌ உடைய சிவபிரானது இடம்‌ திருவீழிமிழலை.

முன்னொரு காலத்து ஏழுலகையும்‌ தன்‌ வயிற்றில்‌ அடக்கிக்‌ காட்டிய திருமாலும்‌, அவ்வுலகங்களைப்‌ படைத்தருளிய நான்முகனும்‌ தன்னை அறியாதவாறு ஒளி பொருந்திய ஐயுருவான சிவபிரான்‌ உறையும்‌ கோயில்‌; நீர்‌ நிறைந்த பொய்கைகளில்‌ பூத்த செழுமையான தாமரை மலர்மீது இள அன்னம்‌ நடை பயில வெண்‌ தாமரை சிவந்த தாதுக்களை உதிர்க்கும்‌ திருவீழிமிழலை ஆகும்‌. அன்னத்தின்‌ நிறத்தால்‌ செந்தாமரை வெண்தாமரை ஆயிற்று. அதன்‌ கால்களின்‌ செம்மையால்‌ பொன்னிறத்‌ தாதுக்கள்‌ செந்தாதுக்கள்‌ ஆயின.

மயக்க உணர்வுடையவரும்‌, பிச்சை ஏற்கும்‌ மண்டை என்னும்‌ பாத்திரத்தை கையில்‌ ஏந்தியவரும்‌, நற்குணங்கள்‌ இல்லாதவர்களும்‌ ஆகிய சமணர்களும்‌, புத்தர்களும்‌ திருவீழிமிழலையில்‌ வாழ்கின்றார்கள்‌. அவர்களைப்‌ புறக்கணித்துவிட்டு தன்னை வழிபடும்‌ அன்பர்களுக்கு வினைவயத்தால்‌ பொருந்திய பிறப்பினைப்‌ போக்கியவன்‌ சிவபெருமான்‌. மிகுதியான தேனீக்கள்‌ தேனை உண்டு களித்து ஒலி செய்கின்றன. பசுமை நிற மேனியும்‌, பொன்நிறக்‌ காலுமுடைய கிளிகளும்‌, களிப்புற்ற மயில்களும்‌, இங்குள்ள சோலைகளில்‌ மிகுதியாக உன்ளன. இங்குள்ள சோலைகள்‌ ஒளியோடு தோன்றும்‌ கதிரவன்‌ இருக்கும்‌ வான மண்டலத்தை அழகுறுத்துகின்றன. இத்தகைய சிறப்பு வாய்ந்த திருவீழிமிழலையில்‌ சிவபெருமான்‌ எழுந்தருளி அருள்‌ செய்கின்றான்‌.

வீழிமிழலையுள்‌ எழுந்தருளிய விகிர்தனாகிய இறைவனைப்பற்றி மணம்‌ பொருந்திய சீகாழிப்பதியில்‌ தோன்றி கலைவல்ல ஞானசம்பந்தன்‌ பாடியருளிய பாடல்கள்‌ பத்தினையும்‌ யாழிசையில்‌ பாட வல்லார்களும்‌ சொல்லக்‌ கேட்டார்களும்‌ ஆகிய அனைவரும்‌ ஊழான்‌ வரும்‌ வினைகள்‌ நீங்கச்‌ சிவப்பேறு எய்துவர்‌.