திருவேணுபுரம்

வண்டுகள்‌ மொய்க்கும்‌ கூந்தலை உடைய பெண்ணாகிய உமையம்மை, தன்னிற்‌ பிரியாதிருக்கத்‌ தன்‌ திருமேனியில்‌ இடப்பாகத்தை அளித்து, அப்பாகம்‌ முழுதும்‌ பெண்‌ வடிவானவனும்‌, பிறையணிந்த திருமுடியை உடையவனும்‌ ஆகிய பெருமானது ஊர்‌, தாமரை மலரில்‌ விளங்கும்‌ திருமகள்‌ வாழும்‌ வெண்மையான பெரிய மாடங்கள்‌ விண்ணைத்‌ தாங்குவன போல உயர்ந்து விளங்கும்‌ வேணுபுரமாகும்‌.

படைத்தல்‌, காத்தல்‌, அழித்தல்‌ ஆகிய முத்தொழில்‌ புரிவோனும்‌, அவற்றின்‌ முடிந்த பயனாய வீட்டின்ப வடிவாய்‌ விளங்குவோனும்‌, பருமை நுண்மை இவற்றிற்கோர்‌ எல்லையாக இருப்பவனும்‌, வேதங்களை ஓதும்‌ கணங்களை உடையோனும்‌, வஞ்சகமான பூதப்‌ படைகளை உடையவனும்‌ ஆகிய சிவபிரானது ஊர்‌, பக்கங்களில்‌ வெடித்து மலர்ந்திருக்கும்‌ கமுகம்‌ பாளையின்‌ மணத்தோடு புன்னை மலர்களின்‌ மணத்தைத்‌ தாங்கி மெல்லெனப்‌ பெருமிதத்தோடு வரும்‌ தென்றல்‌ காற்று மிகுந்து வீசும்‌ வேணுபுரம்‌ ஆகும்‌.

தாருகாவனத்து முனிவர்கள்‌ ஏவிய மதநீர்‌ ஒழுகும்‌ யானையை அம்முனிவர்கள்‌ வெருவுமாறு உரித்துப்‌ போர்த்தவரும்‌, படத்தோடு கூடிய பாம்பைக்‌ குழையாக அணிந்தவரும்‌ ஆகிய சிவபிரானது பழமையான ஊர்‌, நடனத்துக்குரிய சதிகளோடு கூடிய நடையையும்‌, அழகிய பவளம்‌ போன்ற சிவந்த வாயினையும்‌ குளிர்ச்சியான பார்வை உடைய கண்களையும்‌, கொண்டுள்ள அழகிய மகளிர்‌ பலர்‌ வாழும்‌ வேணுபுரம்‌ ஆகும்‌.

தக்கனது தலையை வீரபத்திரக்‌ கடவுளைக்‌ கொண்டு அரியச்‌ செய்து, பிழையை உணர்ந்து அவன்‌ வேண்டிய போது அவனுக்கு மிகுதியான வரங்கள்‌ பலவற்றை அளித்தருளிய வானோர்‌ தலைவனாகிய சிவபெருமானது ஊர்‌, மேகங்கள்‌ முழவாக ஒலிக்க, நாற்புறமும்‌ மயில்கள்‌ ஆடுவதும்‌, மிகுதியான தேனை வண்டுகள்‌ அருந்தும்‌ வளமுடையதுமான பொழில்கள்‌ சூழ்ந்த வேணுபுரம்‌ ஆகும்‌.

அன்போடு வழிபடும்‌ நாம்‌ எவ்வுருவில்‌ நினைக்கின்றோமோ அவ்வுருவில்‌ தோன்றி நம்மை ஆட்கொள்பவனும்‌, தன்னை நணுகாதவராகிய அசுரர்களின்‌ வானில்‌ திரிந்த மூன்று புரங்கள்‌ வெந்தழியுமாறு வில்லை வளைத்துக்‌ கணை தொடுத்து எரியூட்டியவனும்‌ ஆகிய சிவபிரானது ஊர்‌, மரங்களில்‌ அமர்ந்த மந்திகள்‌ தேனின்‌ சுவை பொருந்தியனவாய்ப்‌ பழுத்துத்‌ தோன்றிய வாழைப்‌ பழங்களைக்‌ கண்டு அவற்றை உண்ணுதற்‌ பொருட்டு மேல்‌ நோக்கியவாறே தாம்‌ ஏறிப்பறிக்க இயலாத தம்‌ நிலைக்கு வருந்தும்‌ பொழில்கள்‌ சூழ்ந்த வேணுபுரம்‌ ஆகும்‌. “வாழை மரத்தில்‌ குரங்கு ஏறாதன்றோ”.

மண்ணுலக மக்களும்‌ விண்ணகத்‌ தேவரும்‌ கண்டு நடுங்கி மிகவும்‌ அஞ்சுமாறு நிலமெல்லாம்‌ நிறைந்த நீர்‌ மூடிக்‌ கடல்‌ ஊழி வெள்ளமாய்‌ ஒங்க, அவ்வெள்ளத்திலும்‌ அழியாது உயர்ந்து தோணியாய்த்‌ தோன்றுமாறு செய்த சிவபிரானது ஊர்‌, தண்ணிய மணம்‌ கமழும்‌ தாமரை மலர்கள்‌ சாயுமாறு "இளவாளை மீன்கள்‌ வானிடை எழுந்து குதிக்கும்‌ நீர்வளம்‌ சான்ற பெரிய வேணுபுரம்‌ ஆகும்‌.

மலையரையன்‌ மகளாகிய பார்வதி தேவி அஞ்சுமாறு கயிலை மலையைப்‌ பெயர்த்தெடுத்த வலிமை சான்ற இராவணனின்‌ தலைகள்‌ தோள்கள்‌ ஆகியவை நெரியுமாறு கால்‌ விரலை ஊன்றிய சிவபிரானது ஊர்‌, ஆறு அங்கங்களோடு வேதங்களின்‌ தொகுதியைக்‌ கற்றுணர்ந்தோர்‌ தம்முள்‌ கூடும்‌ கூட்டத்தில்‌ விலை மதிப்புடையவராக தேர்ந்து பேசும்‌ கல்வி நலம்‌ சான்றவர்‌ வாழும்‌ வேணுபுரம்‌ ஆகும்‌.

உலகை உண்ட திருமாலும்‌ தன்‌ அடிகளைக்‌ காணாது அலமருமாறு செய்தவனும்‌, அச்சம்‌ உடைய பிரமனது கிள்ளப்பட்ட தலையோட்டினை ஏந்தியவனுமாகிய சிவபிரானது ஊர், ஆழ்ந்த கடலில்‌ வாழும்‌ சங்குகள்‌, கடல்‌ தரும்‌ உப்பங்கழியைச்‌ சேர்ந்து, பின்னர்‌ அதை விடுத்துச்‌ செந்நெல்‌ விளைந்த அகன்ற வயலில்‌ வந்து உறங்கும்‌ வேணுபுரம்‌ ஆகும்‌.

அழுக்கேறிய உடலினை உடையவர்களாகிய சமணர்‌ கூட்டத்‌ தினரோடு, புத்த மதத்தினராகிய தேரர்களும்‌ ஒளி பொருந்திய திருவடிகளை வணங்காமையால்‌, அவர்களால்‌ அறியப்பெறாத சிவபிரானது ஊர்‌; அழகிய ஆடை தோயும்‌ அல்குலையும்‌, உடுக்கை போன்ற இடையையும்‌, பருத்த தனங்களையும்‌, ஆடவர்‌ மேல்‌ தம்‌ குறிப்பு உணர்த்து நெரியும்‌ புருவங்களையும்‌ உடைய அழகிய மகளிர்‌ வாழும்‌ வேணுபுரம்‌ ஆகும்‌.

இவைபத்தும்‌ - துன்பம்‌ தரல்‌ இல்லாத இந்தப்‌ பத்துப்‌ பாடல்களும்‌. துன்பம்‌ நீக்குமாற்றை ஊன்றி நோக்கி இன்புறுக. கேதம்‌ - இன்பம்‌.