1
பாடக மெல்லடிப் பாவையோடும் படுபிணக் காடிடம் பற்றிநின்றுநாடகம் ஆடும்நள் ளாறுடைய நம்பெரு மானிது என்கொல்சொல்லாய்சூடக முன்கை மடந்தைமார்கள் துணைவ ரொடுந்தொழு தேத்திவாழ்த்தஆடக மாடம் நெருங்குகூடல் ஆலவா யின்கண் அமர்ந்தவாறே.
சொற்பிரிப்பு
பாடக மெல் அடிப் பாவையோடும், படு பிணக்காடு இடம் பற்றி நின்று,நாடகம் ஆடும், நள்ளாறு உடைய, நம்பெருமான்! இது என்கொல் சொல்லாய்சூடக முன்கை மடந்தைமார்கள் துணைவரொடும் தொழுது ஏத்தி வாழ்த்த,ஆடகமாடம் நெருங்கு கூடல் ஆலவாயின் கண் அமர்ந்த ஆறே?
உரை
பாடகம் என்னும் அணிகலன் அணிந்த மென்மையான அடிகளை உடைய உமையம்மையோடு, பிணக்காடாகிய இடுகாட்டைப் பற்றி நின்று நாடகம் ஆடும் நள்ளாற்று நம் பெருமானே! கையில் வளையல் அணிந்த மகளிர் தம் துணைவர்களோடும் கூடி வந்து வழிபடும்படியாய்ப் பொன் மாளிகைகள் நிறைந்த கூடல் ஆலவாயின்கண் நீ விரும்பி உறைதற்குக் காரணம் யாதோ? சொல்வாயாக. குறிப்புரை: பாடகம் - காலணிகளுள் ஒன்று. பாடக, மெல்லடி என்று இணைத்தது பாடகத்தின் வன்மையும் அதனைத் தாங்கல் ஆற்றாத அடியின் மென்மையும் குறித்தவாறு. சூடகம் - வளை. துணைவர் - கணவர். ஆடகமாடம் - பொன் மாளிகைகள்.