திருக்காட்டுப்பள்ளி

வயலின்கண்‌ நீர்‌ பாய, அதனால்‌ களித்த செங்கயல்‌ மீன்கள்‌ துள்ள, துள்ளிய மீன்கள்‌, வயலின்மீது தொங்கிக்‌ கொண்டு இருந்த பூங்கொம்புகள்மீது உரச, அதனால்‌ சில மலர்களில்‌ இருந்து தேன்‌ வடிந்து கொண்டிருக்கின்றது. கைக்கெட்டும்‌ தூரத்தில்‌ வாழை மரங்கள்‌ கனிகளை ஈன்று பழங்கள்‌ வெடித்து முதிர்ந்துள்ளன. இதனால்‌ காடெல்லாம்‌ தேன்‌ மணமும்‌ வாழைப்பழ மணமும்‌ திருக்காட்டுப்‌ பள்ளியுள்‌ கமழ்ந்து கொண்டு இருந்தன. நச்சுப்பையினருகே அழலும்‌ தன்மை உடைய ஐந்து வாயை உடைய ஆதிசேடனை அணையாகக்‌ கொண்ட திருமாலையும்‌, உமையம்மையையும்‌ பாகமாகக்‌ கொண்டு (அரியர்த்தர்‌, அர்த்தநாரீசுரம்‌) விளங்கும்‌ இறைவன்மீது பற்றுக்‌ கொண்டு ஏனைய பற்றுக்களை விட்டவர்‌, வீட்டுலகை அடைவர்‌.

காவிரியின்‌ வாய்க்கால்கள்‌ எல்லா மலர்களையும்‌ சுமந்தும்‌, செழுமையாக மணிகள்‌ முத்துக்கள்‌ பொன்‌ ஆகியவற்றை வாரிக்கொண்டும்‌ வந்து இருகரைகளிலும்‌ அழகு பொருந்த உராய்ந்து வளம்‌ சேர்க்கும்‌ ஊர்‌ திருக்காட்டுப்‌ பள்ளி ஆகும்‌. பாம்புகளை இடையில்‌ கட்டிய செல்வராய்‌ எழுந்தருளியிருக்கும்‌ சிவபிரானுக்கு, வேதம்‌ முதலான மேம்பட்ட உரைகள்‌ யாவற்றையும்‌ உணர்ந்த நல்ல உத்தமராய்த்‌ தொண்டு செய்யின்‌, அல்லல்‌ அறுக்கலாம்‌.

புலித்தோலை ஆடையாக உடுத்தவன்‌. யானைத்‌ தோலை அழகிய போர்வையாகப்‌ போர்த்தவன்‌. திருவெண்ணீறாகிய சுண்ணத்தில்‌ செறிந்து விளங்கும்‌ பூணூலை மார்பகத்தே உடையவன்‌. தேவர்கட்குத்‌ தலைவன்‌. பதிஞானத்தாலே அன்பர்கள்‌ வழிபாடு செய்யும்‌ திருவடிகளை உடையவன்‌. கரிய கண்டத்தை உடையவன்‌. பலராலும்‌ விரும்பப்‌ பெறும்‌ திருக்காட்டுப்‌ பள்ளியில்‌ இமையாத மூன்றாவது கண்ணை நெற்றியில்‌ உடைய அவ்விறைவன்‌ மின்னல்‌ போன்ற இடையினை உடைய உமையம்மையோடு விரும்பி எழுந்தருளியிருந்தான்‌.

காவிரி நதி சலசல என்னும்‌ ஒலிக்‌ குறிப்போடு சந்தனம்‌ அகில்‌ முதலியவற்றை அடித்து வந்து, சந்தனத்தைக்‌ கரையில்‌ சேர்த்துப்‌ பற்பல வாய்க்கால்களின்‌ தலைப்பில்‌ ஆரவாரித்து ஓடிப்‌ பாய்ந்து வயல்களில்‌ இழிந்து திருக்காட்டுப்‌ பள்ளிக்கு வளம்‌ சேர்க்கின்றது. கலகல என்னும்‌ ஓசையோடு அதிரும்‌ கழல்களை அணிந்த இறைவனால்‌ விரும்பப்படும்‌ திருக்காட்டுப்‌ பள்ளியை அடைந்து இறைவனது பொருள்சேர்‌ புகழ்பேசும்‌ தொண்டர்களால்‌ துதிக்கப்படும்‌ அச்சூலபாணியின்‌ திருவடிப்‌. பெருமையை நாமும்‌ கூறித்‌ தோத்திரிப்போம்‌.

திருக்காட்டுப்பள்ளியில்‌ வாழ்கின்ற உழத்தியர்‌ தங்கள்‌ தலைமுடிகள்‌ அவிழும்படியாக வயல்களில்‌ செழித்துள்ள நீலம்‌, நெய்தல்‌, செங்கழுநீர்‌, தாமரை முதலிய மலர்களைக்‌ களைந்து எறிகின்றனர்‌. அத்துணை வளம்‌ உடைய களர்‌ திருக்காட்டுப்பள்ளி. இவ்வூர்‌ எல்லாராலும்‌ விரும்பப்படுவது. புல்லாங்குழல்‌ போன்ற துளைக்‌ கருவிகளில்‌ பயிலுகின்றவர்கள்‌ எழுப்புகின்ற ஒலியும்‌, யாழ்‌ வாசிப்போர்‌ எழுப்புகின்ற இன்னிசையும்‌ இவ்வூரில்‌ இடைவிடாது ஒலித்துக்‌ கொண்டே இருக்கின்றன. பாம்புகள்‌ தங்கள்‌ வளையினின்றும்‌ வெளிவராதவைகள்‌. அப்பேர்ப்பட்ட பாம்புகளைத்‌ தன்‌ இடையில்‌ கட்டி எழுந்தருளிய செல்வராகிய சிவபெருமானுக்கு அடியவர்களாய்‌ விளங்கித்‌ தொண்டு செய்யுங்கள்‌. உங்கள்‌ துன்பங்கள்‌ நீங்கும்‌.

திருக்காட்டுப்‌ பள்ளியில்‌ வாழ்கின்ற வலிய உழத்தியர்கள்‌ நெற்‌ பயிர்களின்‌ நாற்றைப்‌ பிடுங்கி எடுக்கும்‌ வேலை செய்யும்‌ பொழுது, வயல்‌ சேற்றில்‌ இருக்கும்‌ நுண்‌ திருமிகளால்‌ அவர்கள்‌ கைகளின்‌ மணிக்கட்டுகளில்‌ இனவு (ஊரல்‌) ஏற்படுகின்றது. அந்தத்‌ தினவைப்‌ போக்குவதற்குக்‌ கரும்பின்‌ ௬வையுடைய வெல்லக்‌ கட்டியை தங்கள்‌ மணிக்கட்டில்‌ வைத்து உடைத்து நசுக்கி விடுகிறார்கள்‌. தினவு நீங்கி விடுகிறது. இத்துணை வளம்‌ பொருந்திய திருக்காட்டுப்‌ பள்ளியை விரும்பி உறைகின்றான்‌ சிவபெருமான்‌. தேவர்களும்‌ அசுரர்களும்‌ திருப்பாற்கடலை கடைந்த பொழுது, அக்கடலில்‌ இருந்து வெளிப்போந்தது, ஆலகால விஷம்‌. அந்த விஷத்திலிருந்து வீசிய நச்சுக்‌ காற்று உலகனைத்தையும்‌ அழித்து விடும்‌ தன்மையில்‌ விளங்கியது. அந்த விஷத்தை எடுத்து சிவபெருமான்‌ உண்டான்‌. அதனால்‌ அவனது கழுத்து கருநிறமாக மாறியது. அவன்‌ திருமேனியில்‌ திருநீறு அணிந்துள்ளான்‌. இப்பெருமானை நினைந்து அபிடேக நீர்‌ மலர்கள்‌ ஆகியவற்றை எடுத்துச்‌ சென்று அவன்‌ முன்‌ நின்று துதித்து அவன்‌ திருவடிகளைக்‌ கையால்‌ தொழும்‌ திறம்‌ உடைய தொண்டர்கள்‌ தமது அரிய வினைகள்‌ நீங்கப்‌ பெற்று அவனுக்கு அடிமை செய்து வாழ்வர்‌.

தலையில்‌ பிறையை அணிந்தவனும்‌, பெரியோர்கள்‌ தலைவனும்‌, வேதங்களை அருளியவனும்‌,; மழுவையும்‌ வாளையும்‌ உடையவனும்‌, நீண்ட கரிய கடலிடையே தோன்றிய நஞ்சினை உண்ட கறைக்‌ கண்டனும்‌, கலை சேர்ந்த நுதல்‌ விழியால்‌ காமனைக்‌ காய்ந்தவனும்‌, அன்பர்களின்‌ குறைகளைக்‌ கேட்டறிபவனும்‌, குறட்பூதச்‌ செல்வனுமாகிய திருக்காட்டுப்‌ பன்ளியில்‌ உள்ள இறைவன்‌ திருவடிகளை நான்தோறும்‌ விரும்பி ஏத்தி அத்திருவடிகளையே கைகூப்பினோம்‌.

தேவர்க்குப்‌ பகைவராய திரிபுரத்து அசுரர்களுடைய மூன்று கோட்டைகளையும்‌ செவ்வழலால்‌ எரியூட்டி அழித்துப்‌ பெருவீரத்தோடு விளங்குகின்றான்‌ சிவபெருமான்‌. அவன்‌ கற்றவர்களால்‌ தொழுது ஏத்தி வணங்கப்படுவதால்‌ மேம்பட்டு விளங்குகின்றான்‌. அவன்‌ விரும்பிக்‌ காதலித்து அருளாட்சி செய்துவரும்‌ ஊர்‌ திருக்காட்டுப்பள்ளி ஆகும்‌. மெய்யுணர்வு பெற்ற தேவர்கள்‌ பலரும்‌ இங்கு வந்து இறைவனைத்‌ தொழுது ஏத்தி வணங்குகிறார்கள்‌. அவன்‌ அறவிடை மீது ஏறி அமர்ந்திருப்பவன்‌. அப்பெருமானுடைய புகழை அன்றி மற்றோர்‌ பேச்சுப்‌ பேசுவதில்லை.

நிறம்‌ பொருந்திய காவியாடையை மேனியில்‌ போர்த்து, உச்சி வேளையில்‌ வயிறு கொள்ளாத அளவில்‌ தின்று பொய்‌ கூறும்‌ உடல்‌ பருத்த புத்தர்‌, இடையில்‌ உடையில்லாத திகம்பர சமணர்‌ கூறுவன நற்பயனைத்‌ தாராதன என்பதை அறிந்து கொள்ளுங்கள்‌. உலகைப்‌ படைத்த வேதாசாரியனான பிரமனும்‌, மாலுங்‌ காணாத முதல்வன்‌ உறையும்‌ திருக்காட்டுப்‌ பள்ளிக்குச்‌ சென்று வண்டு அமரும்‌ மலர்க்‌ கொன்றை புனைந்த வார்‌ சடையோன்‌ கழல்களை ஏத்தி வாழ்த்துவோம்‌.

திருமகள்‌ வாழும்‌ தாமரை. நீலம்‌, நெய்தல்‌ ஆகிய மலர்களால்‌ பகலும்‌ இரவும்‌ பொலிவெய்தும்‌' பொய்கைகள்‌ திருக்காட்டுப்பள்ளியில்‌ மிகுதியாக உள்ளன. அக்குளங்களில்‌ கன்னிப்‌ பெண்கள்‌ குடைந்தாடுகின்றனர்‌. அவ்வூரை விரும்பும்‌ "இறைவனைக்‌ கடல்சூழ்ந்த காழி மாநகர்த்‌ தலைவனாகிய ஞானசம்பந்தன்‌ பொருந்திய இன்னிசை கூட்டிச்‌ சொன்ன இத்திருப்பதிகப்‌ பாடலாகிய மாலை பத்தையும்‌ மனத்திடைத்‌ தரிக்க வல்லவர்‌ புகழ்‌ எய்துவர்‌.