1
குறிகலந்தஇசை பாடலினான் நசையாலிவ் வுலகெல்லாம்நெறிகலந்ததொரு நீர்மையனாயெரு தேறிப் பலி1பேணிமுறிகலந்ததொரு தோலரைமேலுடை யானிடம் மொய்ம்மலரின்பொறிகலந்த பொழில்சூழ்ந்த யலேபுயலாரும் புகலூரே.பாடம் : 1ஏறும்பலி
சொற்பிரிப்பு
குறி கலந்த இசை பாடலினான், நசையால், இவ் உலகு எல்லாம்நெறி கலந்தது ஒரு நீர்மையனாய், எருது ஏறி, பலி பேணி,முறிகலந்தது ஒருதோல் அரைமேல் உடையான் இடம்மொய்ம் மலரின்பொறி கலந்த பொழில் சூழ்ந்து, அயலே புயல் ஆரும் புகலூரே.
உரை
சிவபெருமான் சுரத்தானங்களைக் குறிக்கும் இசையமைதியோடு கூடிய பாடல்களைப் பாடுபவன். அவன் உயிர்கள்மீது கொண்ட பெருவிருப்பால் இவ்வுலகம் முழுவதும் வாழும் அவ்வுயிர்கள், தம்மை உணரும் நெறிகளை வகுத்து, அவற்றுள் கலந்து நிற்பவன். எருதின்மிசை ஏறிவந்து மக்கள் இடும் பிச்சையை விரும்பி ஏற்பவன். இடையில் மான் தோலாடையை உடுத்துபவன். அவன் விரும்பி உறையும் இடம், செறிந்த மலர்கள்மீது புள்ளிகளை உடைய வண்டுகள் மொய்த்துத் தேனுண்ணும் வானளாவிய பொழில் சூழ்ந்த திருப்புகலூர் ஆகும்.